Fýtboldan 2018/2019 jylǵy maýsymynyń ÝEFA sýperkýbogynyń fınaldyq saıysy kelesi jyldyń 14 tamyzynda Túrkııanyń Ystambul qalasyndaǵy «Beshıktash» stadıonynda ótedi.
2016 jyldyń 11 sáýirinde 80 mıllıon AQSh dollaryna salynǵan bul stadıon 41 903 kórermenge eseptelgen. Endi «Beshıktashta» sol maýsymdaǵy Chempıondar lıgasynyń jeńimpazy men Eýropa lıgasynda top jarǵan komanda ózara kúsh synasyp, ÝEFA sýperkýbogynyń ıegerin anyqtaıdy.
Esterińizge sala keteıik, aıtýly jarys 1972 jyldan beri qart qurlyqtyń ár qıyrynda úzdiksiz uıymdastyrylyp keledi. Dúbirli dop dodasynda eń kóp oljaǵa kenelgen Ispanııanyń «Barselonasy» (1992, 1997, 2009, 2011, 2015) men Italııanyń «Mılany» (1989, 1990, 1994, 2003, 2007). Olardyń árqaısysy bes retten dara shyqty. Madrıdtiń «Realy» tórt márte (2002, 2014, 2016, 2017) top jarsa, Anglııanyń «Lıverpýli» (1977, 2001, 2005), Gollandııanyń «Aıaksy» (1972, 1973, 1995) jáne Madrıdtiń «Atletıkosy» úsh retten dál sondaı qurmetke bólendi. Al Belgııanyń «Anderleht» (1976, 1978), Ispanııanyń «Valensııa» (1980, 2004) jáne Italııanyń «Iýventýsy» (1984, 1996) eki márte jeńimpaz atandy. Sondaı-aq, taǵy 14 komanda bir-bir retten top jardy.
ÝEFA sýperkýbogyn eń kóp oljalaǵan ıspandyq klýbtary eken. Pırneı túbeginde jasaqtalǵan komandalar 15 márte bas júldeni ıelendi. Al Italııa – 9, Anglııa –7, Gollandııa men Belgııa – 3, Germanııa, Portýgalııa, KSRO, Reseı, Shotlandııa, Rýmynııa jáne Túrkııa –1 retten teńdessiz dep tanyldy.
Ǵalym SÚLEIMEN,
«Egemen Qazaqstan»