Úshinshi synypqa endi kóshken Nıkolaı Kersman 6-12 tamyz aralyǵynda úsh márte avtokólik aıdap ketip, jol-kólik oqıǵasyna ushyraǵan. Kishkentaı «baýkespeniń» kesirinen onyń ata-anasy endi 1,4 mln teńge aıyppul tóleýge májbúr.
Bul oqıǵa typ-tynysh tamyz aıynda oraldyqtardy tań-tamasha qaldyrdy. 6 tamyz kúni segiz jasar Kolıa eń alǵash kóshede esigi ashyq, kilti «aýzynda» turǵan «Sýzýkı» markaly kólikti aıdap ketken. Kishkentaı «barymtashy» birneshe kósheden ótip baryp, «Lada Granta» kóligine soǵylyp toqtaǵan. 8 tamyz kúni Kolıa úıinen taǵy da qashyp ketip, jol jıeginde ashyq turǵan «Toıota» mıkroavtobýsyn aıdaı jónelgen. Avtokólik ıesi polısııaǵa habarlap, tártip saqshylary sońynan qýǵanda, Kolıa kólikti basqara almaı, kópirdiń tirek-baǵanyna soǵylyp qalǵan. Úshinshi ret – 12 tamyz kúni Kolıanyń kózi «Hyundai» kóligine túsipti. Osy oqıǵalardyń bárinde de kólikter jol jıeginde ashyq-shashyq, qaraýsyz turǵan eken.
– 2 tamyz kúngi oqıǵada Nıkolaı Kersman joly jóndelip jatqan kósheniń beton kedergisine soǵyldy, – deıdi Oral qalalyq jergilikti polısııa qyzmetiniń bastyǵy polısııa podpolkovnıgi Músilim Járdemov.
Abyroı bolǵanda kishkentaı «júrgizýshiniń» ózi din aman. Ákesi 47 jastaǵy Aleksandr Kersmannyń aıtýynsha, Nıkolaı kishkentaı kúninen tehnıkaǵa qumar, tynymsyz bala bolyp ósken. Eń súıikti oıyny – kompıýterlik kólik jarysy eken. Onyń ústine, otyz jylǵa taıaý júrgizýshilik eńbek ótili bar ákesi avtobýs júrgizýshisi bolǵan kezinde ulyn qasyna, tipti aldyna otyrǵyzyp, ózimen birge alyp júrgen eken.
Joǵarydaǵy úsh oqıǵa boıynsha da Qazaqstan Respýblıkasy Qylmystyq kodeksiniń 200-baby boıynsha («avtokólikti aıdap ketý») qylmystyq is qozǵalǵan. Onyń ústine, «kámeletke tolmaǵandy tárbıeleý mindetin atqarmaǵany», «ata-analyq mindetterin durys oryndamaǵany úshin» Kolıanyń ata-anasy da jaýapkershilikke tartylǵan. Joǵaryda soǵylyp-búlingen avtokólik ıeleri ózderine kelgen shyǵyn mólsherin 1,4 mln teńgege baǵalap otyr eken. Ekinshi top múgedegine bul qarjyny tóleý de ońaı bolmasa kerek.
Oral qalalyq ishki ister basqarmasynda ótken brıfıngke arnaıy aldyrylǵan kishkentaı Kolıa bul áreketti jasaýǵa ne sebep bolǵanyn túsindirip aıta almady. Tipti «átteń, boıym kishkentaı, aldymdy kóre almaı qaldym, áıtpese eshteńege soǵylmas edim» dep aqtalyp qoıady. Áke-sheshesi, ata-ájesi bar bala eshteńeden tarshylyq kórmeı ósip keledi eken. О́ziniń plansheti, kompıýteri de bar. «Kolıa óte ásershil, tehnıkany óte jaqsy kóredi, avtokóliktiń búkil markasyn tanıdy, kishkentaıynda únemi kólik júrgizip oınaıtyn. Bilmeımin, ásirese sońǵy eki aptada tipti óte ásershil bolyp, ózgerip ketti», deıdi ákesi A.Kersman.
Muǵalimderiniń aıtýynsha, mektepte Nıkolaı Kersmannyń sabaǵy da, tártibi de jaqsy kórinedi. Buryn esepte turmaǵan. Oqys oqıǵadan keıin mektep dırektory Nıkolaıǵa jeke jolyǵyp, mán-jaıdy bilýge tyrysqan. «Qylmystyq is tergeýi barysynda biz Nıkolaıdy qylmysqa ıtermelegen ne nárse ekenin anyqtaımyz. Ázirge ony jol-kólik apatyna túsken avtokólikter turatyn aıyp turaǵyna aparyp kórsetip, kólik júrgizý – óte jaýapty is ekenin, jaýapsyzdyq ómirge qaýipti ekenin túsindirip, profılaktıkalyq áńgime júrgizemiz», deıdi Oral qalalyq jergilikti polısııa qyzmetiniń bastyǵy, polısııa podpolkovnıgi M.Járdemov.
Qazbek QUTTYMURATULY,
«Egemen Qazaqstan»
Batys Qazaqstan oblysy