Búginde Qazaqstannyń kórshi О́zbekstanmen qarym-qatynasy nyǵaıa túsken. Qaı salada bolsyn, mádenı, saýda-sattyq jáne basqa da máselelermen barys-kelis jıilegen. Iаǵnı keden beketteriniń qyzmeti burynǵydan qyzý. Bul oraıda keden qyzmetkerleri qalypty jumys istep, mindetterin minsiz atqarýǵa tyrysýda.
Jýyrda áleýmettik jelilerde Qazaqstan-О́zbekstan shekara beketinen ótý úshin júk avtokólikteriniń saǵattap kezekte turatyny týraly aqparat tarady. Alaıda Túrkistan oblystyq Memlekettik kirister departamenti áleýmettik jelilerde taraǵan aqparatty joqqa shyǵardy. Departament ókilderiniń aıtýynsha, «Qaplanbek» shekara beketinen ótýge esh kedergi joq.
Oblystaǵy qazaq-ózbek shekara beketterinde azamattardy ótkizý toqtatylmaǵan. Al Qarjy mınıstrliginiń Memlekettik kirister komıteti: «О́zbekstannyń jaqyn jáne alys shet eldermen syrtqy saýdany damytýyna baılanysty Qazaqstan aýmaǵy arqyly О́zbekstanǵa qaraı taýarlar aǵyny edáýir ulǵaıdy. Osyǵan baılanysty 2018 jyldyń naýryz aıynan beri «B.Qonysbaev» ótkizý beketi aldynda Qazaqstan jaǵynan 50-den 100-ge jýyq júk kólikteriniń jınalyp qalýy baıqala bastady», dep habarlady.
Komıtet málimeti boıynsha, «B.Qonysbaev» beketi sótkesine 150 avtokólikti ótkize alady. Degenmen búginde «B.Qonysbaev» keden beketi kúsheıtilgen rejımde jumys istep, sótkesine 250-ge deıin avtokólik ótkizýde eken. «1 tamyz ben 7 tamyz aralyǵynda Qazaqstan jaǵynan О́zbekstanǵa kólikterdiń jınalyp qalýy 200-den 315-ke deıin kóbeıdi. Bul kezeńde ózbek jaǵy tehnıkalyq sebepterge baılanysty ótkizýdi sótkesine 100 birlikke deıin (buryn sótkesine 130-140 ótkizetin) deıin tómendetti», dep túsindirdi mınıstrlik.
Sondaı-aq, «kólikterdi ótkizýdi jedeldetý boıynsha eki keden beketteri basshylarynyń kezdesýi kún saıyn ótkiziletinin» habarlady. Ázerbaıjan, Belorýssııa, Reseı jáne Qyrǵyzstannyń keden qyzmetterine júk aǵynyn, О́zbekstanǵa «Qazyǵurt», «Qaplanbek» jáne «Atameken» ótkizý beketteri boıynsha qaıtaúlestirý jóninde hat joldanǵan.
Sonymen birge sheteldik avtokólik quraldarynyń О́zbekstan aýmaǵy arqyly tranzıttik ótýi Túrkistan oblysyndaǵy «Iаllama (О́zbekstan) – «B.Qonysbaev» (Qazaqstan) jáne Mańǵystaý oblysyndaǵy «Qaraqalpaq (О́zbekstan) – «Tajen» (Qazaqstan) ótkizý beketteri arqyly ruqsat etiletini túsindirilgen. «Sońǵy aptada ózbek jaǵy avtokólikterdi ótkizýdi sótkesine 150-ge deıin ulǵaıtty.
Memlekettik kirister komıteti 16 tamyzda Qazaqstannan О́zbekstanǵa avtokólikterdiń jınalyp qalýy 190-ǵa deıin tómendegenin belgiledi. Sondaı-aq, bul máseleni sheshý úshin «B.Qonysbaev» ótkizý beketin keńeıtý jolymen qaıta qurý josparlanǵan. Qaıta qurýdan soń avtokólikterdi ótkizý qabileti sótkesine bir myńǵa jetetin bolady. Qurylys merzimi 19 aı», delingen mınıstrlik habarlamasynda.
Ǵalymjan ELShIBAI,
«Egemen Qazaqstan»
Túrkistan oblysy