О́ńirdegi kembaǵal jandar arasynda «temir tulpar» tizgindegisi keletinder kóp. Alaıda arnaıy jabdyqtalǵan kólik bolmaǵandyqtan júrgizýshilik kýálikke qol jetkize almaı júr. О́zi qatarlas qurby-qurdastarynyń arman-maqsatyn júzege asyrýǵa qulshyna kirisken Sálimhan Sábıtov jýyrda múmkindigi shekteýli jandarǵa arnalǵan avtomekteptiń jobasyn Almaty qalasynda sátti qorǵap keldi.
«Elimizde alǵash ret qolǵa alynǵan tyń ıdeıany jan-jaqty súzgiden ótkizip, «Ravnaıa doroga» degen ataýmen qoldanysqa engizgeli otyrmyz. Oǵan múmkindikter mol», deıdi oblystyq «Qoǵamdyq kelisim» KMM-niń jetekshi sarapshysy S.Sábıtov. Sálimhannyń ózi de jastaıynan múgedektikke ushyrap, korreksııalyq mektepti bitirgen. «Ardos-Júrek» múgedekter uıymyn qurýǵa atsalysqan. Basqa da qoǵamdyq jumystary jeterlik. Ozyq baǵdarlama «Metall grýpp» kompanııasy tarapynan qoldaý taýyp, 2 mıllıon teńge bólinipti. Bul qarajatqa «Lada granta» avtokóligi satyp alynyp, Reseıdiń Chelıabi qalasynda múgedek adamdarǵa yńǵaılanyp ózgertilmek.
Dárigerlerdiń qorytyndysy boıynsha júrgizýshi kýáligin alýǵa ruqsat etilse, ynta-tilek bildirgen ǵarip jandar qysqa merzimdi kýrstarǵa jazylýǵa, «temir tulpar» júrgizýdiń qyr-syryn meńgerýlerine bolady. Oqý baǵasy bar-joǵy 15 myń teńgeni quraıdy. Avtomektep uıymdastyrýshylary olardy jumysqa ornalastyrý, qosymsha tabys tabý joldaryn da qarastyrýda. «Altyn Qyran» seriktestigi de 4 mılllıon teńge mólsherinde qarjy bólýge ázir. Oǵan taǵy bir jeńil kólik satyp alynbaq. Keleshekte tehnıkalyq qyzmet kórsetý stansasyn qurý da josparda bar. Sóıtip kólikterdi kórshi elge aparmaı-aq jergilikti jerde jabdyqtap bermek.
Búginde oblys ortalyǵynda 8 myńnan astam tirek qımyl júıesi buzylǵan múgedek adamdar turady.
Sol sııaqty jas kásipker Rýslan Smaǵulov ta turmystyq zattar úshin qoldanylatyn quraldy ǵarip jandarǵa oılap taýypty. Onyń aıtýynsha, birde kórshisi bankalardy ashyp berýin ótinip, kómek surap kelgen. Osydan soń bir qoly joq úı sharýasyndaǵy áıelge járdemdesýdiń jolyn izdestirip, bir aıdyń ishinde qurylǵyny jasap shyǵarǵan. Ol qazir tenderge qatysyp, ónimderin Petropavl, Kókshetaý, Astana qalalaryna ótkizip júr. Túıme, kilt, taǵy basqa kúndelikti tutynatyn zattardy ustaýǵa óte yńǵaıly aspapqa suranystyń kóptigi eskerilip, óndiristi keńeıtpek.
«Úzdik áleýmettik joba» óńirlik baıqaýynda jas kásipkerdiń ónertapqysh jańalyǵy jaqsy qyrynan baǵalanyp, 700 myń teńge syıaqy aldy. Búginde 7 myńdaı adam Rýslannyń qoljetimdi qurylǵysyna zárý. Qytaı men Reseıde onyń baǵasy qymbat.
О́mir ESQALI,
«Egemen Qazaqstan»
Soltústik Qazaqstan oblysy