Astanada avtobýs júrgizýshileri 400 myń teńgege deıin alýy múmkin. Bul máselede qoǵamdyq kólikti paıdalanýshylar sheshýshi faktor bolady, dep habarlaıdy Astana qalasy ákimdiginiń baspasóz qyzmeti.
Ákimdiktiń habarynsha, Elordada qoǵamdyq kólikti jaqsartý, yńǵaıly etý boıynsha jumystar júrip jatyr. Jol kartasyn engizý arqyly jol aqysyn tóleýdegi kóleńkeli qarajatty shyǵarýǵa múmkindik berdi.
Qazirgi kúni qalalyq qoǵamdyq kólikti qoldanatyndardyń 90 paıyzy elektrondy kartamen tóleýge kóshti. Jýyq arada «Astana LRT» bul kórsetkishti 95-98% jetkizýdi kózdeýde. Mysaly, elektrondy jol júrý aqysyn eńgizgen alǵashqy aptada kóleńkeli aınalymnan shamamen 15% kiris shyǵaryldy. Tasymaldaýshylar osynyń arqasynda qoǵamdyq kólik sanyn da arttyrýdy kózdeýde.
«Eger qazirgi kezdegideı sýbsıdııa bólinetin bolsa jáne qazirgi kezdegideı paıda taýyp jatatyn bolsaq jyl aıaǵyna deıin jańa avtobýstar alamyz degen oıdamyz, shamamen 20-25 avtobýs. Jospar boıynsha «Iveko» avtobýstaryn jáne jańartylǵan «Ýrban veıv» avtobýstaryn alýdy oılastyrýdamyn», dedi № 3 avtopark basshysy Baýrjan Tileýbergenov.
Sonymen qatar, joldaǵy jaǵdaıdy jaqsartýdyń taǵy bir amaly júrgizýshilerdiń tártibin qolǵa alý. Jáne de bul jumysta sheshýshi kúsh -passajırler. Eger júrgizýshi ýaqytymen júrse jáne jol kólik oqıǵasyna túspese, passajırlerden shaǵym bolmasa, onda eńbegi eki ese ósetin bolady.
«Qazir júrgizýshiler belgilengen 200 myń tg eńbekaqy alady. Eger ol 15-18 kún tolyq eńbek etse, ol zeınetaqy men salyqty shegerip qalǵanda osy aqyny alady. Jáne eger bári durys bolyp, onyń atyna shaǵym túspese, jol oqıǵasyna túspese, jumys erejesin buzbasa qosymsha 200 myń teńge qosylady. Sonymen qatar, uzyn avtobýstarda júretin júrgizýshilerge 50% ústeme qarastyrylǵan. Bárin qosqanda belgilengen eńbekaqymen sanaǵanda 400 myń teńge alýǵa múmkindik bar», dedi B. Tileýbergenov.
Budan buryn habarlanǵandaı, elorda avtobýstarynda saralanǵan tarıf bekitildi.
Osylaısha, qalalyq baǵdarlarda júrgeni úshin tólemdi kartamen júzege asyrý kezinde jol aqysy ózgerissiz 90 teńge kóleminde qaldy. Budan bólek, kólik kartasyn paıdalanýshylaryna arnalǵan basymdyq – birneshe kólikke aýysyp otyryp, tegin júrý quqyǵy saqtaldy. Aqshalaı tólem kezinde qalalyq avtobýsta júrý quny 180 teńge.