Aqtaýda memlekettik qyzmetshilerge Mańǵystaý oblysyndaǵy Ádep jónindegi keńes tóraıymy Nurgúl Jannazarova jáne QR Parlamenti Májilisiniń eks-depýtaty, Qoǵamdyq jáne Ádep jónindegi keńes múshesi Qaırolla Erejepov «Memlekettik qyzmet – meniń tańdaýym», «Basshynyń baǵynysty qyzmetkerlerine qatysty tártiptik etıkasy», «Etıkalyq kodekstiń talaptaryn qadaǵalaý» jáne «Ujymdaǵy jalpylama adamgershilik-etıkalyq normalarǵa sáıkes qarym-qatynas mádenıetin qalyptastyrý» taqyrybynda dáris oqydy.
Memlekettik qyzmetshilerdiń parasattylyq mádenıetin qalyptastyrýdyń negizgi aspektileri, qyzmettik ádep normalarynyń buzýshylyqtaryn aldyn-alý jáne ujymda jaqsy moraldyq-ádeptilik normalaryn ornatý jaıy túsindirildi.
Atalmysh shara QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń 2018 jylǵa arnalǵan memlekettik qyzmettegi ádeptilik deńgeıin kóterý boıynsha keshendi josparǵa sáıkes, QR Prezıdenti janyndaǵy Memlekettik basqarý akademııasynyń oblystyq fılıalynda memlekettik qyzmetshilerdi qaıta daıarlaý jáne biliktiligin arttyrý aıasynda ótkizildi.
Qaırolla Erejepov dáris barysynda memlekettik qyzmette óziniń jolyn qalyptastyrý tájirıbesimen bólisti, qoıylǵan suraqtar jaýap berdi. Boıyńda kásibı iskerilik bolsa jáne adal eńbek etseń mansaptyq satymen ósýge bolady dedi ol. Onyń ústine qazirgi jaǵdaı múldem basqasha, memleket barynsha jaǵdaı jasap otyr. Eń bastysy qara basyńnyń qamy emes, halyqtyń qamyn oılaý qajet ekendigin aıtty.
Leksııaǵa qatysqan jas memlekettik qyzmetshiniń biri – Eljas Nurahanuly. Q.Jubanov atyndaǵy Aqtóbe óńirlik memlekettik ýnıversıtetin «Memleket jáne jergilikti basqarý» mamandyǵy boıynsha támamdaǵan. Memlekettik qyzmetke turǵanyna 6 aı bolǵan. Qazirgi ýaqytta Beıneý aýdany apparaty ákiminiń bas mamany.
-Biz sııaqty jas mamandardyń úıreneri kóp. Sondyqtan da osyndaı leksııalarǵa qatysý mańyzdy dep bilemin. Menińshe memlekettik qyzmetshi aldymen kásibı bilimdi jáne boıynda jaýapkershilik bolýy kerek. Eń aldymen halyqpen jumys jasaıtynyn bir sátke bolsyn esten shyǵarmaýy tıis. Jalpy ýnıversıtet qabyrǵasynda da, kúndelikti jumys barysynda da zańnyń belshesinen baspaı, adal bolý kerektigi únemi aıtylyp júr, deıdi jas maman.
Al Ádep jónindegi keńes tóraıymy Nurgúl Almasqyzy jas memlekettik qyzmetshilerdi patrıot bolýǵa shaqyrdy. Memlekettik qyzmet salasyndaǵy reformalardy júzege asyrý boıynsha kóptegen jumystar atqarylýda, ásirese kadrlyq áleýet, eńbekaqy máselesi, mansaptyq ósý boıynsha naqty sharalar qolǵa alynǵandyǵyn aıtty. Mańǵystaý óńirinde memlekettik qyzmetke degen qyzyǵýshylyq eki ese artqanyn aıtty. Búginde memlekettik qyzmettegi bir orynǵa keı mekemelerde 10-20 úmitkerdiń talasy bar.
Aıta ketý kerek, akademııa fılıalynyń qabyrǵasynda «Memlekettik qyzmetshilerdiń ádebi», «Memlekettik qyzmettegi etıka jáne ımıdj», «Taım menedjment» jáne taǵy basqa taqyryptarda birneshe leksııalar uıymdastyrylǵan. Al kýrstar túrli baǵytty qamtıdy, ásirese psıhologııa, jeke jáne zańdy tulǵalardyń ótinishterin qaraý, tekserý is-sharalarynyń tártibin saqtaý. Memlekettik qyzmetshilerdiń ádep kodeksiniń talaptaryn túsindirý boıynsha semınarlar jáne «Tıimdi basshy – tıimdi qyzmetker» saǵaty ótkizilgen.
Kezdesý barysynda memlekettik qyzmetshilerge «Memlekettik qyzmetshiniń ádebi jáne minez-qulyq normalary» kitapshasy (pocketbook) týraly aıtyldy. Atalǵan kitapshada memlekettik qyzmetshilerdiń jumys ýaqytyndaǵy jáne jumystan tys ýaqyttaǵy negizgi minez-qulyq qaǵıdalary qarastyrylǵan, jaǵdaıattyq mysaldar negizinde memlekettik qyzmetshiler úshin qysqasha nusqaý usynylǵan jáne tájirıbede beıádep minez-qulyq faktileriniń eń kóp taraǵan túrleri keltirilgen.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy