Halqymyzdyń tamasha aqyny, sóz zergeri, Memlekettik Ánuran avtorlarynyń biri Jumeken Nájimedenovtiń anasyna arnaǵan óleńiniń bir shýmaǵy: Týǵan jer dep, týǵan jer, Úı mańynan ketpediń. «Týǵan jerdi bir ǵana, Qoshalaq qum dep pe ediń!», dep óriledi. Sál oı júgirte qarasańyz osy bir aýyz shýmaqta tereń mán men maǵyna jatqandaı kórinedi. Iаǵnı munda týǵan jer tórkinin týǵan elge ulastyra bilý uǵymy bar. Ekinshi bir oı turǵysynan qaraǵanda bul óleń joldary Elbasy usynǵan «Týǵan jer» baǵdarlamasymen úndes. Onyń aýqymy izinshe op-ońaı keńeıip týǵan elge aınalady dep túıin jasaıdy Memleket basshysy.
− «Rýhanı jańǵyrý» baǵdarlamasyn basqarý boıynsha respýblıkalyq keńse bastamashy bolyp otyrǵan oqýshylardyń ólketaný aksııasy da Prezıdent alǵa qoıǵan mindetter men «Týǵan jer» arnaıy jobasy aıasyndaǵy oblysaralyq san alýan is-sharalardan tamyr tartady. Bul bilim men tárbıe berý isinde ólketaný jumystarynyń aýqymyn meılinshe keńeıte túsýge múmkindik beredi. Orta mektepte týǵan jerdiń tarıhy men onyń kıeli jerleriniń qupııasy men tylsym syryn jan-jaqty túsindirý – patrıotızmniń eń jaqsy úlgisi. Osy oraıda elimizdiń ár aımaǵyndaǵy jas órenderdiń ózge oblystardaǵy kórnekti oryndarmen tanysýynyń, bul úshin bir aptalyq arnaıy baǵyttar belgilenýiniń bereri mol. Aqtóbege Qaraǵandy oblysynan mektep oqýshylary men jetekshilerden qurylǵan 67 adamnyń kelýi osyndaı maqsatty kózdeıdi, − dedi Aqtóbe oblystyq bilim basqarmasynyń basshysy Lıazzat Orazbaeva.
Qaraǵandy oblystyq bilim basqarmasynyń ókili Álibek Bısenbaevtiń sózine súıensek, ótken shilde aıynda 60 aqtóbelik jasóspirim Saryarqanyń sary dalasyna týrıstik-ekskýrsııalyq saparmen baryp qaıtypty. Jas qonaqtardy qarsy alý jáne olardy óńirdegi kıeli nysandarmen tanystyrý kezegi men estafetasy endigi kezekte aqtóbelikterge kelipti. Atap óterlik másele, 60 qaraǵandylyq oqýshynyń basty quramyn arnaıy mektep-ınternattardyń tárbıelenýshileri men turmysy tómen az qamtylǵan otbasylardyń balalary quraıdy.
Úsh kúnniń ishinde ekskýrsııalyq baǵyt boıynsha jas qonaqtar tanysatyn óńir ǵajaıyptary mol. Qaraǵandylyq oqýshylar alǵashqy tanysqan nysandardyń biri − oblys ortalyǵynda ótken jyly ashylǵan «Jekpe-jek saraıy». Munda sporttyń jekpe-jek túrleri boıynsha respýblıka chempıonaty men halyqaralyq týrnırler ótkizilip keledi. Sondaı-aq saryarqalyq ul-qyzdar óńirlerde balamasy joq Shyǵarmashylyq akademııa ǵımaratynda ózderiniń turǵylastary shuǵyldanatyn stýdııada bolǵan kezde qyzyǵýshylyǵyn jasyra almady. Al «Jubanovtar álemi» murajaı úıi ózinshe bir álem, ózinshe bir syrly dúnıe dese de bolady. Qaıtalanbas talanttardan turatyn mýzykalyq áýletten órbigen naǵyz akademıkterdiń ómir joly men qyzmeti ári qazaq óneri men mádenıetine jáne ǵylymyna qosqan súbeli úlesi jasóspirimderge mol áser qaldyrdy.
Keńes odaǵynyń eki dúrkin batyry Talǵat Bıgeldınov atyndaǵy áýe qorǵanysy kúshteri áskerı ınstıtýtyndaǵy áýe tehnıkasy mýzeıi de elimizdegi aıryqsha nysandar qataryna kiredi. Bul arada alǵan áserin 11 jastaǵy qaraǵandylyq jas qyran Kırıll Chıkalov bylaısha bildirdi.
– Ushqysh otyrǵan kabınaǵa kirip, onyń shtýrvalyn kórgen kezde meni aıryqsha sezim bıledi. Ony qalaı basqarýǵa bolatynyn tyńdaǵan sátimde qııalym taǵy da kókke órlep ketti. Osy kezde týǵan jer men Otanymdy kez kelgen ýaqytta qorǵaýǵa ázir bolýym kerektigin tereń túısingendeı boldym.
Al 13 jasar Móldir Esenjolǵa shyǵystyń batyr qyzy Álııa Moldaǵulova murajaıy úlken áser qaldyrypty. − Mergendikpen nysanaǵa dál kózdeý qasıeti ata-anamyzdyń qanymen berile me eken, joq álde bul úzbeı jattyǵýdyń nátıjesi me, qaıtkende de Álııa apama uqsaǵym keledi. Maıdannan jazylǵan hattar men áskerı kıimder de kóńilimdi bosatýmen birge, erik-jigerimdi ushtaǵandaı kúı keshtim. Aqtóbe kórikti qala eken. Maǵan mundaǵy kórnekti oryndardyń bári de unady, − deıdi batyldyǵy men ójettigi kózinen kórinip turǵan qarshadaı qyz.
О́z kezeginde Qaraǵandy oblysynyń jetekshi ókili Hamıt Ibragımov tanymdyq turǵydan jan-jaqty ári tereń oılastyrylǵan ekskýrsııa baǵdarlamasy oqýshylarmen birge eresekter úshin de asa tartymdy bolǵanyn aıtyp berdi. Aqtóbe aımaǵyndaǵy sakraldy nysandardyń, sonyń ishinde HVII-XVIII ǵasyrlardan syr ańǵartatyn Abat Baıtaq jáne Qyz Áýlıe kesenelerimen jáne Qobylandy men Eset batyr memorıaldyq keshenimen tanysý sátinde úlkenimiz bar, kishimiz bar − bárimiz birdeı ǵasyrlar qoınaýymen qaýyshqandaı kúı keshtik. О́tkensiz búgin joq. О́tken tarıhymyz ben salt-dástúrlerimizdi qasterleý arqyly ǵana órkenıet kóshine bet túzeı alatynymyz anyq. Aqtóbe sapary bizge osy aqıqatty taǵy bir dáleldep berdi, dedi ol odan ári. Qobda topyraǵynda jáne Alǵa aýdanyndaǵy «Kúnshýaq» saýyqtyrý lagerinde bolǵan kezinde elimizdiń ortalyǵy men batysyndaǵy balǵyn jastar bir-birimen etene jaqyndasyp, emen-jarqyn oı-pikir almasyp, sport túrlerinen joldastyq kezdesýler ótkizdi. Qalaı degende de, baldyrǵandardyń oılaý qabileti men dúnıetanym sheńberiniń ósýi ekskýrsııanyń eń basty oljasy men qundylyǵy bolyp qala bermek. Olar araıly Aqtóbe aımaǵynan elimizde osyndaı qyzyqty da tartymdy ekskýrsııalar men joryqtar jıirek bola tússe eken degen tilekpen tarqasty.
Temir Qusaıyn,
«Egemen Qazaqstan»
Aqtóbe
Sýrette: qaraǵandylyq jas qyrandardy qarsy alý sátinen kórinis