– Toqsan jyldyq toı qutty bolsyn!
– Toı toıǵa ulassyn!
El aýzyndaǵy sóz, aqjarma tilek osy.
Keshegi keńes zamanynda Eńbekshilder atalyp kelgen, Alashtyń aqıyǵy Birjan saldyń kindik qany tamǵan qasıetti topyraq 2017 jyldyń 13 jeltoqsany kúni Qazaqstan Respýblıkasynyń Prezıdenti N.Nazarbaevtyń Jarlyǵymen Birjan sal aýdany bolyp atalǵan bolatyn. Aq túıeniń qarny jarylǵan qýanyshqa jalǵyz aýdan turǵyndary ǵana emes, jalpaq jurt birge qýanǵan. Búgin, mine, máńgi jasyl qaraǵaılar men qoldyń salasyndaı aqqaıyńdar kómkergen Máńgilik Eldiń mereıli bir pushpaǵynda kóp kóńilindegi qýanyshtar atoı salǵan aýdannyń toqsan jyldyq toıy.
Toıshy qaýym Birjan sal babamyzdyń alystan kóz tartatyn eńseli eskertkishine gúl shoqtaryn qoıdy. Aýdan ortalyǵynda mádenıet jáne demalys saıabaǵy ashyldy. Sóz arasynda saıabaqtyń buryn da bolǵandyǵyn aıta ketelik. Búgingi keıpi zamana talabyna saı jańǵyrǵan, jasarǵan túri. Mazmunmen baıytylǵan, mol maǵyna ústelgen. Rýhanı jańǵyrý úrdisimen qaıta jańǵyrtylǵan mádenı nysan el suranysyn tolaıym eskergendigi baıqalady. Arqa tósindegi toı án-jyrsyz bolýshy ma edi. Ásem áýen Kóksheniń kórkem qyrattarynan asyp, Oqjetpestiń shyrqaý bıigine ilinip qalǵandaı.
Birjan sal atyndaǵy Mádenıet saraıyndaǵy saltanatty májilis «Birjan sal eli» fılminiń tusaýkeserimen bastaldy. Aýdannyń toqsan jyldyq tarıhyn tolaıym qamtyǵan fılm bes taraýdan turady eken. Ot-jalyndy otyzynshy jyldardy, zulmat soǵys pen tyń kóterý tusyndaǵy aýyr eńbekti, táýelsizdik jyldaryndaǵy teńdessiz ósý jylnamasyn kóz aldyńa jaıyp salǵanda, ǵajap bir áserge bólenesiń. Kórermender de ózderiniń atalary men ájelerin, adal eńbekterimen el qurmetine bólenip júrgen azamattardy tanyp qýanysyp otyrdy.
Aqmola oblysynyń ákimi Málik Myrzalınniń quttyqtaýyn jetkizgen onyń orynbasary Qanat Ydyrysov Birjan sal aýdanynyń áleýmettik-ekonomıkalyq damý barysyndaǵy tolaıym jetistikterdi juptap aıtyp berdi. Talaı tarıhı tulǵalardy tárıbelegen bul aýdan qazaq mádenıetiniń altyn besigi bolýymen qatar, Elbasynyń strategııalyq baǵyttaryn júzege asyrýda ózgege ónege kórsetip keledi. Bul aýdanda zamanaýı agrokeshen qurylyp, ındýstrııalyq-ınnovasııalyq úrdis maqsatkerlik sıpatqa ıe bolyp otyr. Memleket basshysy Nursultan Nazarbaevtyń «О́rken-Atansor» temir kenishin, «KazBeej LTD» ozyq úlgidegi iri qara bordaqylaý kesheniniń ashylýy án-jyrdyń altyn besigi atanǵan óńirdiń búgingi áleýetin tanytsa kerek.
Jıynda bir top eńbek adamyna oblys ákiminiń Alǵys hattary tapsyryldy. Aýdan ákimi Ermek Nuǵymanov jınalǵan jurtshylyqty tolaǵaı toımen quttyqtap, eldiń órkendeýine eleýli úles qosyp kele jatqan azamattardy arnaıy daıyndalǵan merekelik medaldarmen marapattady.
Án Mekkesinde eki kún boıy shyraıly saltanat sátimen sabaqtalyp, ulttyq sport túrlerinen jarqyn jarystar uıymdastyryldy.
Baıqal BAIÁDIL,
«Egemen Qazaqstan»
Aqmola oblysy,
Birjan sal aýdany