Fýtzaldan Almatyda ótip jatqan stýdentter arasyndaǵy álem birinshiliginde Qazaqstannyń erler quramasy tabysty óner kórsetip, óreli ónerimen óz jankúıerlerin qýantýda.
Toptyq týrnırdiń tusaýkeser kezdesýinde 2016 jylǵy álem birinshiliginiń qola júldegeri Chehııa quramasyn 4:3 esebimen utqan jerlesterimiz kelesi týrda Jańa Zelandııanyń qaqpasyna jaýapsyz eki gol soqty – 2:0. Úshinshi básekede Belarýspen kezdestik. Olar da osal qarsylas emes. 2014 jyly Ispanııada ótken dúnıejúzilik dodada belarýstikter úshinshi orynǵa taban tiregen bolatyn. Bul match 1:1 esebimen teń aıaqtaldy. Osylaısha, óz tobynda birinshi oryn alǵan Qazaqstan quramasy pleı-off dodasyna joldama aldy.
Jarys jolynda endi segiz myqty komanda ǵana qaldy. Shırek fınalda otandastarymyz Argentına quramasymen kúsh synasady. Ońtústik Amerıkanyń oǵlandary osy kúnge deıingi stýdentterdiń aıtýly dop dodasynda jeńis tuǵyryna kóterile almaǵanymen, bul elde fýtzal óte keremet qarqynmen damyǵanyn jankúıerler jaqsy biledi. Atap aıtsaq, osydan eki jyl buryn ulttyq qurama komandalar arasynda Kolýmbııada ótken álem chempıonaty argentınalyqtardyń jeńisimen aıaqtalǵan edi. Desek te bizdiń jigitter óz jerimizde ótip jatqan jarysta jankúıerlerdi jerge qaratpaıdy dep úmittenemiz. Bul báseke 23 tamyzda ótedi.
О́kinishke qaraı, Qazaqstannyń áıelder quramasy bul jarysta sátsiz óner kórsetýde. Alǵashqy kezdesýde 3:5 esebimen Jańa Zelandııaǵa ese jibergen arýlarymyz kelesi matchta Portýgalııadan oısyraı utyldy – 1:14. Búgin jerlesterimiz Fransııaǵa qarsy oınaıdy.
Ǵalym SÚLEIMEN,
«Egemen Qazaqstan»
ALMATY