Memlekettik turǵyn úı baǵdarlamasy halyqtyń kóp jyldardan bergi baspanaǵa degen qajetin qanaǵattandyryp, baıyptylyǵyn tanytty. Qaı eldi mekende bolmasyn jańa salynǵan qurylys kózge túsedi.
Almaty men Taldyqorǵanǵa sapar shekkender Saryózektegi jol boıynda qaz-qatar jańa úlgide, sapaly salynǵan jeke turǵyn úılerdi kóredi ári eriksiz qyzyǵady. Sońǵy eki jylda kóshe uzaryp, qurylys jalǵasyp, qonys toılary kóbeıdi.
Kerbulaqtyq 16 otbasy jańa jyldy ásem ári jaryq shańyraqta qarsy alady. Kóshe el mereıtoıy qurmetine «Táýelsizdik» dep ataldy. Úıli bolǵandar negizinen bıýdjettik mekeme qyzmetkerleri desek, Bıǵalı Súleımenov aýdannyń mal dárigeri bolyp qyzmet atqarady. Buǵan deıin páter jaldaǵan otbasy qýanyshqa keneldi. Sondaı-aq Janǵazy Jeksembaevtyń otbasy da baspanaly boldy.
Úı bólý kezinde Uly Otan soǵysy ardagerlerine, kóp balaly analarǵa, dárigerler men muǵalimderge, múmkindigi shekteýli jandarǵa basymdyq berilgen. Saryózek kentiniń ózinde kóp qabatty turǵyn úıdegi birneshe páter kúrdeli jóndeýden ótti.
Jańa jylda da aýdanda kommýnaldyq turǵyn úı qurylysy jalǵasady. О́ıtkeni, úı kezeginde áli de eki júzden astam adam bar. Memlekettik turǵyn úı qurylysyn jedeldetý arqyly olardyń suranysyn qanaǵattandyrý kózdelip, jospar jasalǵan.
Kúmisjan BAIJAN.
Almaty oblysy.