Qyzyljar óńirinde qurylys ındýstrııasy qarqyndy damyp kele jatqanyn myna sıfrlar aıǵaqtasa kerek. Tek bıyldyń ózinde áleýmettik salalardy qaıta jańǵyrtýǵa 18,8 mıllıard teńge qarjy baǵyttalyp, jyl sońyna deıin 230 myń sharshy metr turǵyn úıdi tapsyrý josparlanǵan. Bul kórsetkish ótken jylǵa qaraǵanda 20 prosentke artyq.
«Jas órken», «Bereke» syndy zaman talabyna laıyqtalyp salynǵan shaǵyn aýdandarda oqýshylar saraıy, 900 jáne 600 oryndyq eki mektep, bir aýysymda 250 naýqasty qabyldaýǵa arnalǵan eki emhana men 700 orynǵa shaqtalǵan kópbeıindi aýrýhana, 500 oryndyq qazaq sazdy drama teatry taǵy basqa áleýmettik-mádenı nysandardyń qurylysy jalǵasýda.
«О́tken jyly oblys ortalyǵynda on bir kópqabatty turǵyn úı paıdalanýǵa berilip, myńnan astam otbasy qonystoı toılady. Bıyl bólingen qarajattyń 70 prosenti ıgerildi. Qazirgi qyzý qarqynǵa qaraǵanda, alǵa qoıǵan meje sózsiz oryndalady», dedi oblystyq qurylys basqarmasynyń basshysy Serik Muhamedıev. Onyń sózine qaraǵanda «Nurly jer» memlekettik baǵdarlamasy sheńberinde 14,7 mıllıard teńge bólingen. Jalpy alǵanda, 2018-2019 jyldar aralyǵynda 97 myń sharshy metr turǵyn úı kópshilik ıgiligine berilip, 1,5 myń otbasy pátermen qamtamasyz etilmek. Bul – óńirde buryn-sońdy bolmaǵan kórsetkish.
Jýyrda atalǵan baǵdarlama aıasynda «Satyp alý quqyǵymen jalǵa beriletin turǵyn úı» baǵyty boıynsha 116 páter ıesin tapty. Jaıly baspananyń kiltin oblys basshysy Qumar Aqsaqalov saltanatty jaǵdaıda tabys etti. Úlken qýanyshqa jınalǵandar aldynda sóılegen sózinde ákim jańa páterlerdiń Elbasy bastamashy bolǵan «Nurly jer» jobasy aıasynda turǵyzylǵanyn, birinshi kezekte kóp balaly analar men otbasylarǵa, jetim balalarǵa, múmkindigi shekteýli jandarǵa berilgenin jetkizdi. «Memlekettik baǵdarlamalar arqasynda jerlesterimiz óz ómirlerin sapaly túrde jaqsartýǵa tolyq múmkindik alyp otyr», dedi ol.
«Nurly jer» baǵdarlamasynyń operatory «Báıterek» UBH» AQ-tyń enshiles kásiporny «Qazaqstan ıpotekalyq kompanııasy» IU AQ ekeni belgili. Kompanııa jyl sońyna deıin 96 páterlik taǵy bir úıdi iske qosýdy mejelep otyr. Onyń basqarýshy dırektory Arman Muqatovtyń aıtýynsha, satyp alý quqyǵymen jalǵa beriletin turǵyn úıler birinshi kezekte álsiz áleýmettik sanatqa jatatyn toptardy qamtıdy. Jaldaý qunynyń bir sharshy metri aıyna 772 teńgeden aspaıtyny, bastapqy jarna men artyq tólemderdiń bolmaýy páterlerdiń qoljetimdiligin, otbasylyq qarjylyq júktemeniń azdyǵyn ańǵartady. Jıyrma jyl merzimge berilgen páter keıin jalǵa alýshynyń basybaıly menshigine ótedi. Baspana qunyn merziminen buryn óteýge de bolady. Kompanııa eki jyldyń ishinde jalpy aýmaǵy 22121 sharshy metr bolatyn 410 páterdi kezekte turǵan adamdarǵa tapsyrǵan.
9300 sharshy metr aýmaqty quraıtyn, satyp alý quqyǵymen jalǵa beriletin turǵyn úılerdi salýmen «Albat qurylys» seriktestigi aınalysyp, 850 mıllıon teńge jumsaǵan.
– Qyzym baspana kezeginde 12 jyl turǵan edi. Endi eki bólmeli jaıly baspanaǵa qol jetkizip, qýanyshyna ortaqtasyp kelip otyrmyn, – deıdi aq jaýlyqty áje Altynshash Ramazanova kóńil tolqynysyn jasyra almaı.
Byltyr áljýaz sanatta páterli bolǵan 400 otbasy qonystoı toılasa, bıyl 240 páter salynýda. 2019 jyly 442 páterlik 9 kópqabatty turǵyn úı turǵyzylmaq. Al qala aýmaǵyndaǵy «Solnechnyı» kentinde úsh jyldyń ishinde osy zamanǵy sáýlet úlgisimen eki myńnan astam jeke úı boı kóterýge tıis.
О́mir ESQALI,
«Egemen Qazaqstan»
Soltústik Qazaqstan oblysy