2011 jylǵy 21 jeltoqsanda Qazaqstan Respýblıkasynyń Ortalyq saılaý komıssııasy Qazaqstan Respýblıkasy Parlamenti Májilisi depýtattarynyń kezekten tys saılaýy jónindegi saıası partııalar úshin daýys berýge arnalǵan saılaý bıýlleteniniń mátinin bekitti.
Ortsaılaýkom Qazaqstan Respýblıkasyndaǵy saılaýshylardyń jalpy sanynyń 1 paıyzy rezervin qosa alǵanda, daıyndalýy jáne saılaý ýchaskelerine jetkizilýi tıis saılaý bıýlletenderiniń sanyn belgiledi.
Qazaqstan Respýblıkasy Parlamenti Májilisi depýtattarynyń kezekten tys saılaýy jóninde – 9 398 154, al Qazaqstan Respýblıkasy máslıhattary depýtattarynyń kezekti saılaýy jóninde – 17 423 313 saılaý bıýlleteni daıyndalatyn bolady.
Jańaózen qalasynyń aýmaǵynda Parlament Májilisi depýtattary men máslıhattar depýtattaryn saılaý buryn belgilengen merzimde, ıaǵnı 2012 jylǵy 15 qańtarda ótedi, óıtkeni, Prezıdenttiń bul aýmaqtyq-ákimshilik birlikte tótenshe jaǵdaı engizý týraly Jarlyǵymen saılaýdy ótkizýge tyıym salynbaǵan.
Osyǵan baılanysty Ortsaılaýkom, Jarlyqpen belgilengen shekteýlerdi eskere otyryp, kandıdattar men saılaýshylardyń quqyqtaryn qamtamasyz etý úshin barlyq qajetti sharalardy qabyldaýda.
Bul adam quqyǵy salasyndaǵy Qazaqstan Respýblıkasy qol qoıǵan halyqaralyq qujattarǵa qaıshy kelmeıdi. О́ıtkeni engizilgen shekteýler adamnyń Azamattyq jáne saıası quqyqtar jónindegi halyqaralyq pakt bekitken «absolıýttik» quqyqtary men bostandyqtaryn shektemeıdi. Tek saılaýaldy úgit júrgizý tásilderiniń aıasyn belgili bir dárejede taryltady. Jáne bul rette barlyq saıası partııalar men máslıhat depýtattyǵyna kandıdattar teń, degenmen, úgit jumysyn júrgizýdiń nysandary men ádisterin tańdaýda belgili bir dárejede shekteýli jaǵdaıda bolady.
Atap aıtqanda, qala aýmaǵynda negizinen saılaýaldy úgitti beıbit jınalystar, mıtıngiler, sherýler, pıketter men demonstrasııalar ótkizý arqyly júrgizý shekteledi.
Alaıda, buqaralyq aqparat quraldarynda úgit naýqany tolyq kólemde ótkiziletin bolady. Osyǵan baılanysty Ortsaılaýkom máslıhattar depýtattyǵyna kandıdattardyń saılaýshylarmen kezdesýler ótkizýine bıýdjetten bólingen qarajatty buqaralyq aqparat quraldarynda qosymsha úgit materıaldaryn jarııalaý jáne baspa ónimderin shyǵarý úshin paıdalanýyna ruqsat beredi.
Parlament Májilisi depýtattaryn saılaýǵa qatysatyn saıası partııalardyń úgit materıaldary Jańaózen qalasy turǵyndaryna respýblıkalyq jáne jergilikti tele-radıoarnalar men baspa buqaralyq aqparat quraldary arqyly jetetin bolady.
Qalalyq máslıhat depýtattyǵyna kandıdattar baspa ónimderin ázirleý úshin oblystyq tıpografııanyń qyzmetin paıdalana alady.
Qalalyq saılaý komıssııasy shtattyq rejimde jumys isteýde. Komıssııanyń qaramaǵynda barlyq qajetti ádistemelik materıaldar men qujattar bar.
Saılaý naýqany barysyn baıqaýdy uıymdastyrýǵa keletin bolsaq, baıqaýshylar men sarapshylarǵa, sonyń ishinde shet memleketter men halyqaralyq uıymdardyń ókilderine, bul óńirge barý múmkindigi qamtamasyz etiletin bolady. Sondaı-aq, olar saılaý barysy, saılaý organdarynyń jumysy, barlyq saılaý prosesine qatysýshylardyń qyzmeti týraly aqparatpen de qamtamasyz etiledi.
Sondaı-aq Ortsaılaýkom basshysy saılaý týraly zańǵa sáıkes buqaralyq aqparat quraldary kandıdattar men saıası partııalardyń saılaý naýqanyn obektıvti jarııalaýǵa mindetti ekenin eskertti. Bul rette, kandıdattar men saıası partııalardyń ar-namysyna, qadir-qasıetine jáne iskerlik bedeline nuqsan keltiretin úgit materıaldary men ózge de aqparatty jarııalaýdan aýlaq bolý kerek.
Barlyq kandıdattar men partııalyq tizimderin usynǵan saıası partııalardyń saılaýaldy úgit júrgizýi úshin buqaralyq aqparat quraldaryna teń jaǵdaıda qol jetkizýi kepildendirilýi tıis.
* * *
Máslıhattar depýtattyǵyna kandıdattardy tirkeý qorytyndylary týraly
20 jeltoqsanda máslıhattar depýtattyǵyna kandıdattardy tirkeý aıaqtaldy.
Aldyn ala málimetter boıynsha, usynylǵan 10 myńnan astam úmitkerdiń 9165-i máslıhattar depýtattyǵyna kandıdat retinde tirkelgen.
Sonyń ishinde oblystyq, Astana men Almaty qalalyq máslıhattaryna – 1752; aýdandyq máslıhattarǵa – 5523; qalalyq máslıhattarǵa – 1890 kandıdat.
Tirkelgen kandıdattardyń 3446-sy – «Nur Otan» halyqtyq-demokratııalyq partııasynyń, 11-i – Qazaqstannyń Patrıottary partııasynyń, 22-si – «Rýhanııat» partııasynyń, 264-i – Qazaqstannyń «Aq jol» demokratııalyq partııasynyń, 9-y –Jalpyulttyq sosıal-demokratııalyq partııanyń, 99-y – Qazaqstannyń Kommýnıstik halyqtyq partııasynyń, 50-i – Qazaqstan sosıal-demokratııalyq «Aýyl» partııasynyń, 57-si – «Ádilet» demokratııalyq partııasynyń, 3-ýi – Qazaqstannyń «Azat» demokratııalyq partııasynyń, 1-ýi – Qazaqstannyń Kommýnıstik partııasynyń músheleri.
Barlyq tirkelgen kandıdattar 21 jeltoqsannan bastap saılaýaldy úgit jumysyna kirise alady.
* * *
Shet memleketter men halyqaralyq uıymdardyń baıqaýshylaryn akkredıtteý týraly
21 jeltoqsanda Qazaqstan Respýblıkasynyń Ortalyq saılaý komıssııasy Qazaqstan Respýblıkasy Parlamenti Májilisi depýtattary men máslıhattary depýtattarynyń saılaýyna shet memleketter men halyqaralyq uıymnyń taǵy 14 baıqaýshysyn akkredıttedi.
Qazirgi sátke deıin Qazaqstan Respýblıkasy Syrtqy ister mınıstrliginiń usynýy boıynsha barlyǵy 61 baıqaýshy akkredıtteldi
Olardyń 46-sy – EQYU/DIAQB Mıssııasynyń, 11-i – TMD Baıqaýshylar mıssııasynyń ókilderi, 4-ýi – shet memleketterdiń baıqaýshylary.
* * *
Ortsaılaýkomǵa kelip túsken ótinishter týraly
2011 jylǵy 16 qarasha men 21 jeltoqsan aralyǵyndaǵy kezeńde Ortsaılaýkomǵa 56 ótinish kelip túsken. Olardyń 38-i saılaý naýqanynyń ártúrli aspektileri boıynsha ótinishter, taǵy 14-i saılaý komıssııalarynyń, saılaý úderisine qatysýshylardyń jáne buqaralyq aqparat quraldarynyń qyzmetine qatysty.
Qazaqstan Respýblıkasynyń Ortalyq saılaý komıssııasy.