Búgin Úkimet otyrysynda QR Eńbek jáne xalyqty áleýmettik qorǵaý mınıstri Mádına Ábilqasymova ózin-ózi jumyspen qamtyp júrgenderdi zańdastyrý boıynsha esep berdi.
Otyrysy barysynda Mádına Ábilqasymova esepke alynǵan jumyskerlerge toqtalyp ótti.
«Búginde 1 mıllıon 385 myń adamnyń mártebesi naqtylandy. Olardyń ishinde 548 myń jumysker eńbek shartyn jasap, mindetti zeınetaqy jarnalary túse bastady. 13 myń kásipker óz qyzmetin resmı túrde tirkedi. 22 myńnan astam adam azamattyq-quqyqtyq sıpattaǵy shart boıynsha jumys isteıtinder, úı jumyskeri jáne sheteldik kásiporyndarda jumys isteıtinder retinde anyqtaldy. 17 myńnan astam adam jumyssyz retinde tirkeldi. 84 myń adam áleýmettik tólemderdi, al 19 myń adam ataýly áleýmettik kómekti alýshy retinde tirkeldi. 29 myń áıel júktilikke baılanysty esepke qoıyldy. 8,7 myń adam úsh jasqa deıingi balasyna kútim jasap otyr», dedi Mádına Ábilqasymova.
Sondaı-aq, 642,5 myń adam úı sharýasyndaǵy áıelder, stýdentter, tys jerlerge ketken adamdar 18 jastan asqan mektep oqýshylary retinde jáne basqa sanattar boıynsha naqtylandy. Derekqorlarda qaıtalanatyn jeke sáıkestendirý nómirleri (JSN), merzimi ótip ketken qujattar anyqtalyp qaıta jańartyldy. Onyń sózine qaraǵanda, 25 tamyzdaǵy jaǵdaı boıynsha derekqorlarda naqty áleýmettik mártebesi joq azamattardyń sany 1 mıllıon 320 myń adamdy qurady. Osylaısha, mınıstr Ábilqasymova búgingi jospardyń teń jartysyn oryndadyq dep otyr.
Atalǵan qujat 2018-2019 jyldarǵa eseptelgen. Oǵan sáıkes, ózin-ózi jumyspen qamtyp júrgenderdi resmı túrde tirkep, xalyqty áleýmettik qorǵaý júıesimen barynsha qamtý kózdelgen.