Bokstan Býdapeshte ótip jatqan jastar arasyndaǵy álem birinshiliginde Qazaqstannyń bes óreni fınalǵa shyqqany jaıynda biz buǵan deıin habarlaǵanbyz. Sondaı-aq, tamyz aıynyń sońǵy kúnderi taǵy úsh qyzymyz bas júlde úshin talasatyn bolady.
Jartylaı fınalda Aızada Islamǵalı (54 kılo), taılandyq Ponnapa Lapandy jeńse, Gýzal Sadyqova (81 kılo) ýkraınalyq Karolına Mahnodan basym tústi. Qos kezdesýde de 5:0 esebi tirkeldi. Asa aýyr salmaq dárejesinde baq synaýshylardyń sany az bolǵandyqtan Dına Islambekova (+81 kılo) birden fınalǵa joldama aldy. Aqtyq synda Aızada amerıkalyq Iýana Verdýskamen kúsh synassa, Gýzal reseılik Anastasııa Rybakpen sheberlik baıqasady. Dınanyń fınaldaǵy qarsylasy – ýkraınalyq Marııa Lovshınska. Al jartylaı fınalda úndistandyq Nıtýden utylǵan Ánel Qudaıbergen (48 kılo) jáne amerıkalyq Heven Garsııaǵa jol bergen Jansaıa Ábdiraımova (51 kılo) qola medaldi qanaǵat tutty.
Burymdylar arasynda ózgelerden Úndistan men Reseıdiń kóshi ilgeri. Qos elden tórt boksshydan fınalǵa joldama alyp otyr. Qazaqstannyń úsh arýy aqtyq synǵa shyqsa, Anglııanyń eki ókili sol mejege shetti. Sondaı-aq, bas júlde úshin talasatyndar qatarynda Horvatııa, Taıland, Kanada, Fransııa jáne Ýkraınanyń bir-bir bylǵary qolǵap sheberi bar.
Erler arasynda Reseıdiń – 7, Qazaqstannyń – 5, Taılandtyń – 2, Pýerto-Rıko, Anglııa, AQSh, О́zbekstan, Vengrııa jáne Kýbanyń – 1 boksshysy fınalda judyryqtasady. Bizdiń jigitterdiń barlyǵy da sheshýshi tusta Reseı qurama komandasynyń múshelerimen kezdesedi. Atap aıtsaq, Ermahan Jaqpekov (69 kılo) Jambolat Bıjamovpen, Nurbek Oralbaı (75 kılo) Danıl Teterevpen, Saǵyndyq Toǵambaev (81 kılo) Rýslan Kolesnıkovpen, Aıbek Oralbaı (91 kılo) Egor Fedorovpen jáne Damır Toıbaı (+91 kılo) Alekseı Dronovpen jekpe-jekke shyǵady.
Ǵalym SÚLEIMEN,
«Egemen Qazaqstan»