Erlan Áýkenov Almaty qalasy ákiminiń jańa orynbasary bolyp taǵaıyndaldy, dep habarlaıdy qala ákimdiginiń baspasóz qyzmeti.
Ákim orynbasary qyzmetin buǵan deıin Murat Dáribaev atqarǵan edi. Onyń basqa qyzmetke aýysýyna baılanysty ornyna Erlan Áýkenov keldi. Almaty qalasynyń basshysy Baýyrjan Baıbek Murat Dáribaevqa atqarylǵan eńbegi úshin alǵys aıtyp, sáttilik tiledi.
Erlan Áýkenov Almaty ákimdiginde kólik, áleýmettik sala, halyqty eńbekpen qamtý jáne tótenshe jaǵdaılar máselelerine jaýap beredi.
Aıta keteıik, E.Áýkenov 2015 jyldyń tamyz aıynda Almaty ákiminiń orynbasary bolyp taǵaıyndalyp, eki jyldan keıin shetelge oqýǵa túsýine baılanysty jumysynan ýaqytsha bosatylǵan edi. Ol ındýstrıaldy-ınnovasııalyq damý, saýda, shaǵyn jáne orta bıznesti damytý máselelerine jaýapty boldy.
«Erlan Áýkenov «Qalalardy damytý» baǵdarlamasy boıynsha Londonnyń ekonomıka jáne saıası ǵylymdar mektebiniń magıstratýrasyn aıaqtaǵannan keıin Almaty ákiminiń orynbasary laýazymyna qaıta oraldy. Ol oqý barysynda ýrbanızasııa, qala aglomerasııasyn qalyptastyrý, ekonomıkalyq aımaqtardy qurý, kólik júıesi men ınfraqurylymdy damytý, sondaı-aq olardyń áleýmettik-ekonomıkalyq prosesterge jáne qala ekologııasyna yqpaly máseleleri boıynsha bilim aldy. Shaǵyn jáne iri megapolısterge «Green Economy» jáne «Resilient city» zamanaýı tujyrymdamasyn engizýge qatysty álemdik tájirıbe zerdelendi», delingen qala ákimdiginiń baspasóz qyzmeti taratqan aqparatta.