Ulttyq at sporty túrlerinen Qazaqstan Respýblıkasy Prezıdentiniń Kýbogy úshin ótetin dástúrli jarys bıyl Astananyń 25 jyldyǵyna arnaldy. Merekelik sharada alaman báıge, top báıge, qunan, taı, jorǵa jarystan bólek aýdaryspaq, qyz qýý sııaqty qan qyzdyrar oıyn oınalyp, Alataý bókterindegi «Kókbastaý» ıppodromyn dýmanǵa bóledi.
Jyl saıyn Konstıtýsııa kúni jalaýy kóteriletin jarys 20 jyl boıyna jalǵasyp keledi. Áý basta aýdandyq deńgeıde bastalǵan shara qazir halyqaralyq sıpatqa ıe bolǵan. Bıylǵy alamanǵa el aýmaǵynan jáne kórshi memleketterden 170 sáıgúlik kelipti. Al uzaq qashyqtyqqa shabatyn júırikterdiń ózi elý shaqty boldy. Jarysqa kil avtokólikter tigilip, jeńimpazdarǵa kilt tapsyryldy.
«Kókbastaý» ıppodromynyń topyraǵyn aldymen júırik taıdyń tuıaǵy tilgiledi. Jankúıerin qıqýǵa bólegen jarysta Jambyl aýdanynyń «Hantáńiri» atty júırik taıy qara úzip kelip, báıgeli boldy. Al qunan báıgede toptan oq boıy oza shapqan Qarasaı aýdanynyń «Nurqasqasy» birinshi oryndy ıelendi. Top báıgede kórshiles Jambyl oblysynan kelip baq synaǵan «Júrektory» atty sáıgúlik shashasyna shań juqtyrmady. Jorǵa jarysynda Astana qalasynan arnaıy kelgen «Edelveıs» atty janýardyń tórt aıaǵy taıpalyp, toptan qara úzip keldi.
Jarystyń qyzyǵy 25 shaqyrymdyq alaman báıge boldy. Jurttyń taqymyn qystyrǵan jarysqa 50 at qatysyp, arasynan Jambyl oblysy úkilep qosqan «Qarkóz» atty júırik qara úzip shyqty. Júırik janýardyń ıesi Artyǵalı Mırazovqa bıylǵy báıgeniń bas júldesi – Ulttyq at sporty túrlerinen Qazaqstan Respýblıkasy Prezıdentiniń Kýbogy men «ÝAZ Patrıot» avtokóligi buıyrdy.
Qalmahanbet MUQAMETQALI,
«Egemen Qazaqstan»
Almaty oblysy,
Jambyl aýdany