Qazaqstandyq sýretshi Káripbek Kúıikov BUU minbesinde sóz sóıleıdi. Bul týraly BUU-daǵy Qazaqstan turaqty ókildiginiń keńesshisi Ánýar Jaınaqov málim etti.
«Káripbek Kúıikovti Qazaqstanǵa tanystyrýdyń qajeti joq, ony shetelde de bári tanıdy», - dep jazdy Ánýar Jaınaqov Feısbýktegi paraqshasynda. Onyń aıtýynsha, Káripbek Kúıikov BUU jańalyqtar stýdııasy men Kyodo News japonııalyq agenttiginiń jýrnalısterine bergen suhbatynda óz ómiri týraly aıtty. Halyqaralyq ıadrolyq synaqtarǵa qarsy is-qımyl kúnine oraı «Anam meni dúnıege ákelgen kezde qoldarymnyń joq ekenin bilip, meniń janyma eki kún boıy jaqyndaı almapty. Dárigerler ata-anama maǵan ıneksııa salyp, uıyqtatyp tastaýdy usynǵan. Biraq, ákem qarsy bolyp, anam ekeýmizdi úıge alyp ketipti... Bala kúnimde barlyq balalarmen birdeı ekenimdi dáleldegim kelip, óz-ózimmen kóp jumys istedim», - dep atap ótti Káripbek. «6 qyrkúıekte jerlesimiz Nıý-Iorkte, BUU bas minbesinde sóz sóılep, óz ómiri týraly barsha álemge aıtyp beredi», - dedi A. Jaınaqov.
Elimizdiń bastamasymen bekitilgen Halyqaralyq ıadrolyq synaqtarǵa qarsy is-qımyl kúnine oraı BUU Bas Assambleıasynyń birinshi resmı otyrysy Astana ýaqytymen saǵat 20:00-ge josparlanǵan. Ony BUU barlyq resmı tilderge aýdarmasymen BUU saıtynda tikeleı efırden tamashalaýǵa bolady.