Sonaý alasapyran soǵys jyldary oq pen ottyń ortasynan aman oralyp, halqyna qaltqysyz eńbek sińirgen partızan jazýshy, Halyq Qaharmany Qasym Qaısenov bıyl júz jasqa toldy.
Kózi tirisinde ańyzǵa aınalǵan abyz tulǵanyń taǵdyrly beınesi árbir qazaqtyń kóz aldynda. Qaraorman qazaqqa ortaq ǵazız tulǵanyń ómirden ótkenine on jyldaı ýaqyt bolsa da, halqy ony áli kúnge deıin saǵyna eske alady. Batyr óziniń «Jaý tylyndaǵy bala» atty shyǵarmasynda soǵys qasiretin beıneleı otyryp, óziniń taǵdyryn ashyp jazady. О́rimdeı kezinde órtke oranǵan maıdan shebine attanǵan Qasymnyń Ýkraına dalasynda qaıtalanbas erlik kórsetkeni tarıhtan belgili.
Barsha qazaqqa ortaq tulǵa Qasym Qaısenovtiń júz jyldyq mereıtoıy búgin Taraz qalasynda toılandy. Jambyl oblystyq ishki saıasat basqarmasy uıymdastyrǵan dańqty tulǵany eske alý keshi M.H.Dýlatı atyndaǵy Taraz Memlekettik ýnıversıtetinde ótti. Áýeli kópshilikke Qasym Qaısenov ómirinen syr shertetin derekti fılm kórsetildi. Budan keıin sahnaǵa aqyn, Qazaqstan Jazýshylar odaǵynyń tóraǵasy Ulyqbek Esdáýlet kóterilip, batyr tulǵa jaıly estelikter aıtty. Ár kezdesýden qalǵan áserin kórermenmen bólisti. Sonymen qatar, shara barysynda jazýshy, Qazaqstan Jazýshylar odaǵy tóraǵasynyń orynbasary Mereke Qulkenov, kóp jyldar boıy Qasym Qaısenovtiń hatshysy bolǵan Erkin Nurazhan sııaqty azamattar da qaharman týraly júrekjardy lebizderin bildirdi. О́z sózinde jazýshy Elen Álimjan da qazaqtyń qaısar uly jaıyndaǵy oıymen bólisti.
Ádebı shara barysynda batyr ómirinen sahnalyq qoıylymdar qoıylyp, kórermendi keremet áserge bóledi. Shapaǵat Ábdir, Aqnur Sultanbekova sııaqty ónerli jastar ánnen shashý shashty. Shynyn aıtqanda, Qasym Qaısenov ómiriniń árbir sáti jınalǵan kópshiliktiń kókeıine úlken oı saldy deýge bolady. Sonymen qatar, jıyn barysynda kópshilikke beımálim jaıt, Qasym Qaısenovtiń kezinde Jambyl oblysynyń qazirgi Jýaly jáne Baızaq aýdandyq atqarý komıteti tóraǵasynyń orynbasary bolyp qyzmet atqarǵany da aıtyldy.
Jıyn sońynda ýnıversıtet rektory Mahmetǵalı Sarybekov jınalǵan kópshilikke alǵys aıta kelip, Ulyqbek Esdáýletti M.H.Dýlatı atyndaǵy arnaıy tósbelgimen marapattady. Ataqty tarıhshynyń beınesi beınelengen kilemsheni syıǵa tartty.
Hamıt Esaman,
«Egemen Qazaqstan»
Jambyl oblysy