Pavlodar oblysyna jasaǵan jumys sapary aıasynda Premer-Mınıstr Baqytjan Saǵyntaev medısınalyq jedel járdem stansııasyna baryp, mamandarmen medısınalyq qyzmet kórsetý sapasyn arttyrý jaıyn talqylady.
Baqytjan Saǵyntaev medısına nysany jumysy negizinde óńirdegi densaýlyq saqtaý salasynyń sıfrlandyrý barysymen tanysty. Jedel járdem brıgadalarynyń jumysyn úılestirýge kómektesetin medısınalyq qurylǵylardy qarap shyqty. Búginde medısına uıymyna 12 joba engizilgen. Olardyń ishinde basqarý men jumys ornynyń avtomattandyrylǵan júıesi, elektrondy medısınalyq karta, navıgasııalyq júıe, naýqasqa tezirek jetý úshin brıgadalardy barlaý, EKG-ny qashyqtan ótý syndy yńǵaıly jańashylyq bar. Sonymen qatar, arnaıy telemedısına men ınteraktıvtik oqý ortalyǵy jumys isteıdi. Mekemede adam ómirine arasha túsip júrgen 1044 qyzmetker bıylǵy segiz aı ishinde 177 myń shaqyrtýǵa shyqqan.
Medısınalyq jedel járdem mekemesiniń jumysymen tanysqan soń, B. Saǵyntaev oblystyń medısına salasy qyzmetkerlerimen kórsetiletin qyzmettiń sapasyn arttyrý jaıynda keńes ótkizdi. Ásirese, dárimen qamtamasyz etý, olardyń baǵasy men medısına ınfraqurylymy jáne mamandar biliktiligi qyzý talqylandy. Bala men ana densaýlyǵyn qorǵaý taqyrybyna erekshe kóńil bólindi.
Densaýlyq saqtaý salasyn damytý aıasynda qolǵa alynyp jatqan sharalar týraly Oblystyq densaýlyq saqtaý basqarmasynyń basshysy O. Muqashev baıandap berdi. Kezdesý qatysýshylary: bas dárigerler, jedel medısınalyq kómek qyzmetkerleri jáne oblystyń densaýlyq saqtaý salasyndaǵy memlekettik jáne jekemenshik mekemeleriniń qyzmetkerleri óz sózderinde salanyń ózekti máselelerin qozǵady. Pavlodar qalasynyń №5 emhanasynyń dárigeri A. Nızamýtdınova medısına qyzmetkerleriniń eńbek aqy máselesin kóterdi. Oblystyń jedel járdem stansııasynyń dárigeri A. Ermek trassalyq medısınalyq-qutqarý pýnktileriniń jumysy týraly sóz sóıledi. Pavlodar aýdany emhanasynyń dárigeri G. Qaıyrbaeva medısına kadrlarymen qamtamasyz etý týraly aıtty. Sırek kezdesetin aýrýlar kezinde dári-dármektermen qamtamasyz etý máselesin Pavlodar oblystyq kardıo ortalyǵynyń kardıology G. Muqanova qozǵady. Pavlodar oblystyq kardıologııalyq ortalyǵynyń kardıohırýrgy A. Antıkeev joǵary tehnologııalyq medısınalyq qyzmetterdi usyný týraly aıtyp ótti. Al №1 emhana dárigeri A. Iseeva óz sózinde densaýlyq saqtaý júıesin sıfrlandyrý prosesine toqtalyp ótti.
Qazirgi tańda Pavlodar oblysynda 118 medısınalyq uıym jumys isteıdi, olardyń ishinde memlekettik uıymdar sany — 42, jeke menshik nysanynyń úlesi — 64,4% (76). 2017–2018 jyldardyń qorytyndysy boıynsha MJÁ, jekeshelendirý, senimdi basqarý tetikteri arqyly 7 medısınalyq uıym básekeli ortaǵa berildi. Oblystyń medısına uıymdarynda 8 500-den astam adam, olardyń ishinde 2200 dáriger jáne 6 300 orta medısına qyzmetkeri jumys isteıdi.
Osy jyldyń basynan beri MJÁ aıasynda densaýlyq saqtaý nysandaryn medısınalyq jabdyqpen jabdyqtaý jáne jańǵyrtý maqsatynda eki joba júzege asyryldy. Investısııalar kólemi 800 mln teńgeni qurady. Jyl sońyna deıin 1,1 mlrd teńgege tórt joba iske asyrylady. Jeke ınvestısııalardyń kólemi jylyna 1,9 mlrd teńgeni quraıdy. Osylaısha, 2017–2018 jyldarǵa arnalǵan ınvestısııalar 4,1 mlrd teńgeni quraıdy.
MJÁ aıasynda Pavlodar qalasynyń №1 qalalyq aýrýhanasynda, Ekibastuz qalalyq aýrýhanasynda jáne Ǵ. Sultanov atyndaǵy oblystyq aýrýhanada kompıýterlik tomograftar ornatyldy. Bul ınsýltke erterek dıagnostıka jasaýǵa jáne ony ýaqytyly emdeýge múmkindik berdi, al bunyń nátıjesinde — ólim-jitim kórsetkishi 13%-ǵa tómendedi. Sıfrlandyrýdy engizý qujattamany toltyrý ýaqytyn qysqartýǵa, emdelýshini qaraý ýaqytyn ulǵaıtýǵa jáne alǵashqy dıagnostıka sapasyn arttyrýǵa jol ashty.
Dárigerlerdiń qoıǵan suraqtaryna Premer-Mınıstr B. Saǵyntaev, Premer-Mınıstrdiń orynbasary A. Jumaǵalıev jáne densaýlyq saqtaý mınıstri E. Birtanov túsinikteme berip ótti. Kezdesýdiń qorytyndysy boıynsha Baqytjan Saǵyntaev densaýlyq saqtaý mınıstri E. Birtanovqa jáne oblys ákimi B. Baqaýovqa medısına qyzmetkerleriniń biliktiligin joǵarylatý jáne usynylatyn medısınalyq qyzmetterdiń sapasyn arttyrý boıynsha birqatar sharalar keshenin ázirleýdi tapsyrdy.