Qazaqstandyq boksshy Gennadıı Golovkın (38-0-1, 34 KO) men meksıkalyq Saýl Alvarestiń (49-1-2, 34 KO) qarymta jekpe-jegin tamashalaý úshin О́skemen turǵyndary tań bozynan Ertis jaǵalaýyndaǵy Amfıteatrǵa jınaldy.
Ústinen oıýly shapanyn tastamaıtyn dańqty boksshymyzdy qoldaýǵa shahar turǵyndarymen birge О́skemen ákimi Jaqsylyq Omar, birneshe dúrkin Olımpıada júldegeri, jeńil atlet Olga Rypakova, Beıjiń Olımpıadasynyń kúmis júldegeri Nurbaqyt Teńizbaev ta keldi.
«Áli esimde, London Olımpıadasynda jarys jolyna shyqqanymda óskemendikter Sport saraıynyń aldyna jınalyp, erekshe qoldaý kórsetken edi. Bul maǵan erekshe kúsh-jiger berdi. Sol sekildi búgin elimizdiń túkpir-túkpirinde jankúıerleri Genaǵa qoldaý bildirip jatyr. Bizdiń qoldaýymyz da sportshynyń jeńiske jetýine áser etetini anyq. Jerlesimizge tek sáttilik tileımiz», - dedi Amfıteatrda kórermender aldyna sóz sóılegen Olga Rypakova.
О́skemen qalasynyń ákimi Jaqsylyq Omar da boksshyǵa sáttilik tiledi. «Barlyq qazaqstandyqtar búgin Genaǵa jankúıer. Gennadıı Golovkın – búkil elge súıkimi artqan, elimizdiń abyroıyn álemge asqaqtatqan belgili sportshy. Bizdiń ulttyq brendimizge aınaldy deýge bolady. Biz árqashan Genaǵa jankúıer bolǵanbyz. Bola da beremiz. О́ıtkeni, ol – bizdiń jerlesimiz, bizdiń maqtanyshymyz», - dedi qala ákimi.
Alańǵa jınalǵan kórermenderden jekpe-jekte kimniń jeńiske jetetinine qatysty pikirlerin da suradyq. «Menińshe, jekpe-jek 12 raýndqa deıin sozylady. Golovkın upaı sanymen jeńiske jetedi», - deıdi qoǵam belsendisi Ádil Saılaýbek.
Azamat QASYM,
«Egemen Qazaqstan»
О́SKEMEN