Almatyda QR Densaýlyq saqtaý mınıstrligi «Dárilik zattardy, medısınalyq maqsattaǵy buıymdardy jáne medısına tehnıkasyn ulttyq saraptaý ortalyǵy» Synaq ortalyǵynyń zerthanalary boıynsha baspasóz týry ótkizilip, onda mamandar medısınalyq preparattardyń dárihanalar jelisine deıingi synaq barysynan habardar etti.
Eýrazııalyq ekonomıkalyq odaq máseleleri jónindegi ókiletti ókil Aqmaral Qabdenovanyń aıtýynsha, dárilik zattardyń ýaqtyly jáne sapaly saraptamasy qaýipsiz, tıimdi jáne sapaly dári-dármektermen qamtamasyz etýdiń negizi bolyp tabylady.
Qazaqstannyń memlekettik farmakopeıasynyń talaptaryna sáıkes kelmeıtin dári-dármekterdi naryqqa jibermeý barysynan jaıynan habardar etken Synaq ortalyǵynyń dırektory Tatıana Abramova zerthanalarda fızıkalyq-hımııalyq, ımmýnobıologııalyq, toksıkologııalyq, mıkrobıologııalyq jáne basqa da synaqtar ótkiziletindigin atap ótti.
Búginde atalǵan Ortalyqta dárilik preparattardyń sapasy men qaýipsizdigin baqylaýǵa arnalǵan 1000-nan astam birlik qural-jabdyq bar. Zerthanalardyń ornalasýy men jumys aımaqtary halyqaralyq standarttarǵa sáıkes jabdyqtalǵan ári eýropalyq úlgiden kem túspeıdi.
2015 jyly Synaq ortalyǵyna dárilik preparattardyń fızıkalyq-hımııalyq synaqtary boıynsha EDQM/MJA-093 (European Directorate for the Quality of Medicine) akkredıtasııalyq attestaty berilgen. Al 2018 jylǵy shildede Ortalyq medısınalyq maqsattaǵy buıymdardyń fızıkalyq-hımııalyq synaqtary jáne dárilik preparattar men medısınalyq maqsattaǵy buıymdardyń bıologııalyq synaqtary turǵysynan akkredıtasııalaý salasyn keńeıtý jáne qoldanylatyn attestatty rastaý maqsatynda EDQM tarapynan júrgizilgen aýdıtten ótken. Ortalyq OMCL dárilik preparattardyń sapasyn baqylaý jónindegi resmı zerthanalardyń Jalpy eýropalyq jelisiniń (GEON) múshesi bolyp tabylatyndyǵy ISO/IEC 17025 halyqaralyq standarty jáne EDQM dırektıvalarynyń talaptaryna sáıkestiginiń aıǵaǵy.
Elvıra Serikqyzy,
«Egemen qazaqstan»
ALMATY