Astana qalasynyń Dostyq úıinde nemis mádenıeti kúni bolyp ótti. Bul is-sharaǵa elordalyq Qazaqstan halqy Assambleıasy qoldaý bildirdi.
«Berlınskaıa polka» ataýymen ótkizilgen fleshmob merekelik keshti jandandyryp jiberdi. Odan ári qonaqtar Dostyq úıindegi nemis mádenıeti kúnine arnalǵan kórmeni aralap, Qazaqstan nemisteriniń tarıhy jónindegi maǵlumatqa qanyqty. Ol boıynsha ár jyldary kóptegen nemister memlekettik nagradalarmen marapattalǵan. Sonyń ishinde jıyrmasy Sosıalıstik Eńbek Eri ataǵyna laıyq bolyp tanylǵan.
Is-sharaǵa kelýshiler «Qazaqstandaǵy nemister» ataýymen uıymdastyrylǵan kórme arqyly Astana men Aqmola oblysyndaǵy nemister tarıhy jóninen tyń derektermen tanysyp shyqty.
Is-shara barysynda Qazaqstan Respýblıkasy Parlamenti Májilisiniń depýtaty Albert Raý men Astana qalasy Qazaqstan halqy Assambleıasy Hatshylyǵynyń meńgerýshisi Lıazzat Qusaıynova taǵylymdyq máni bar keshtiń mańyzy týraly aıtyp berdi.
Nemis mádenıeti kúni baǵdarlamasy boıynsha Dostyq úıindegi úsh zalda bir mezette ótkizilgen vokaldyń, bıdiń, qoldanbaly ónerdiń jáne aspazdyq istiń qyr-syryn meńgerýge arnalǵan sheberlik sabaqtary jurtshylyqtyń qyzyǵýshylyǵyn týdyrdy.
Bir sózben aıtqanda, kelýshiler nemis mádenıetimen, olardyń salt-dástúrlerimen jáne ana tilimen keńirek tanysyp, mol maǵlumat aldy. Merekelik kesh sońy konserttik baǵdarlamaǵa ulasty.