Búgin «Rýhanı jańǵyrý» baǵdarlamasy sheńberinde Býrabaı baýraıynan «Abylaı hannyń qara joly» ekspedısııasy úmitti saparǵa attandy.
Abylaı han alańynan saparǵa shyqqan ekspedısııa on kún ishinde HVIII ǵasyrdaǵy «Kókshetaý-Aqmola-Ulytaý-Túrkistan» kerýen jolymen júrip ótpek. Taǵylymdy ekspedısııa Aqmola oblysynyń ákimi Málik Myrzalınniń tikeleı qoldaýymen jáne qoǵam qaıratkeri Murat qajy Ydyrysulynyń bastamasymen uıymdastyrylyp otyr.
Ekspedısııa quramyna belgili ǵalymdar men tarıhshylar, ólketanýshylar, qoǵam qaıratkerleri jáne buqaralyq aqparat quraldarynyń ókilderi kirgen. Olar on kún boıy Abylaı hannyń taban izi qalǵan «Kókshetaý-Aqmola-Ulytaý-Túrkistan» kerýen jolymen júrip ótip, tarıhı málimetter, tyń derekter jınamaq.
Aldaǵy ýaqytta Abylaı men onyń zamany týraly jınaqtalǵan materıaldar arnaıy jınaq bolyp jaryq kóretin bolady. Sondaı-aq, «Abylaı hannyń qara joly» atty kórkem fılmde túsirý de josparlanǵan.
Ekspedısııa qorytyndysy boıynsha Aqmola oblysy jáne Kókshetaý qalasynyń tabıǵı jáne toponımdik lanshaftasyn qoldana otyryp jınalǵan, elimizde teńdessiz topografııalyq karta qurastyrý mejelengen. .
Shara barysynda «Aqmola-Tirshilik» seriktestiginiń dırektory, jazýshy-dramatýrg, qoǵam qaıratkeri Jabal Erǵalıev pen qoǵam qaıratkeri Murat qajy Ydyrysuly jınalǵandarǵa tarıhı ekspedısııanyń mańyzdylyǵy týraly aıtyp berdi. Sonymen qatar, Abylaı hannyń urpaǵy Sansyzbaı Muhıtanov jáne Mádenıet aýylynyń aqsaqaly Dýlat Ámirov sózi alyp, ekspedısııa múshlerine aq batasyn berip, aqjoltaı sát-sapar tiledi.
Baıqal BAIÁDIL,
«Egemen Qazaqstan»
Aqmola oblysy,
Býrabaı aýdany