«Uly dala qýaty» atty halyqaralyq avtotehnıkalar sherýine qatysýshylar «Qorǵas» shekara mańy yntymaqtastyǵy ortalyǵyna kelip jetti. Bul tabıǵı gazben júretin tehnıkalardyń eń uzaq avtosherýi. Onyń uıymdastyrýshylary Qazaqstannyń, Qytaı men Reseıdiń iri energetıkalyq kompanııalary – «QazMunaıGaz» UK AQ, «SNPC» jáne «Gazprom» AAQ.
Jalpy alǵanda, marshrýttyń uzyndyǵy 9 881 km quraıdy. Onyń aıtarlyqtaı bóligi Qazaqstan Respýblıkasynyń aýmaǵy arqyly «Batys Eýropa – Batys Qytaı» jańa halyqaralyq kólik dálizi arqyly ótedi. Búgingi tańda avtokerýen Qytaı aýmaǵy boıynsha ońtústik-shyǵys jaǵalaýy (Jýdýn q.) arqyly 3 000 shaqyrym jol júrip keldi. Budan ári marshrýt Qazaqstan, Reseı aýmaǵymen Almaty, Taraz, Túrkistan, Qyzylorda, Aral, Aqtóbe (Qazaqstan) jáne odan ári Reseı (Orenbýrg, Almetevsk, Qazan, Nıjnıı Novgorod, Vladımır, Torjok jáne Sankt-Peterbýrg) qalalary arqyly ótedi. Avtosherýdiń qazaqstandyq bóliginde kólikterge gaz quıýdy «QazTransGaz» AQ – Ulttyq gaz operatory qamtamasyz etetin bolady. Avtosherýge qatysýshylardyń márege jetetin kúni VIII Peterbýrg halyqaralyq gaz forýmyn ashý aıasynda Sankt-Peterbýrg qalasynda 4 qazanda josparlanyp otyr.
Avtosherý qatysýshylaryn Qazaqstan jerinde qarsy alǵan «QazTransGaz О́nimderi» JShS bas dırektory Arman Qasenov, sharanyń úlken mańyzǵa ıe ekenin atap ótti. «Bizdiń elder úshin komprımırlengen jáne suıytylǵan gaz naryǵyn damytý salasyndaǵy yntymaqtastyqtyń mańyzy zor» - dep atap ótti Arman Qasenov. – Osy avtosherý gazmotorly otyn túriniń áldeqaıda tıimdi ekenin, onyń artyqshylyqtaryn pash etetin bolady. Búginde Qazaqstanda kóptegen qalalardyń ákimdigi mýnısıpaldy avtokólikterdi osy otynǵa aýystyrýǵa kúsh salyp otyr. Al osy avtosherý sapynda kele jatqan avtobýstar jýyq arada óz elimizde óndirile bastamaqshy».
Avtosherý kolonnasy suıytylǵan jáne komprımırlengen (syǵymdalǵan) tabıǵı gazben júretin 17 júk tasıtyn jáne jeńil avtomobıl men avtobýstardan turady. «QazTransGaz» AQ-na, osy is-sharanyń aıasynda, «Batys Eýropa – Batys Qytaı» transkontınentaldyq kólik dáliziniń qazaqstandyq ýchaskesinde tıimdi gaz quıý ınfraqurylymyn salý josparyn aıqyndaý mindeti tur. Budan basqa, avtosherý dástúrli otyn túrlerine qaraǵanda motor otyny retinde tabıǵı gazdy paıdalanýdyń basymdyǵyn kórsetýge arnalǵan.
Tabıǵı gazben júretin tehnıkalar kolonnasy 16 qyrkúıekte Almaty qalasyna keldi, onda «Jasyl ekonomıka jolyndaǵy avtoónerkásip: kedergiler men perspektıvalar» atty dóńgelek ústel uıymdastyryldy. Onda sala mamandary jáne avtokólik shyǵaratyn zaýyttardyń ókilderi gazmotorly otyn naryǵyn damytý joldary men problemalary týraly oılaryn ortaǵa salyp, memleket tarapynan kórsetilip jatqan qoldaý sharalaryna toqtaldy. Dóńgelek ústel qorytyndysy boıynsha ekonomıkalyq jaǵynan da ekologııa turǵysynan da áldeqaıda tıimdi tabıǵı gazdy motor otyny retinde paıdalanýdy jan jaqty qoldaý týraly qarar qabyldady. Bul qujatqa 21 qyrkúıek kúni avtosherý kolonnasy Aqtóbe qalasyna jetken sátte qol qoıý josparlanyp otyr.
Búgingi tańda Qazaqstanda kólik sektoryn jańǵyrtý jáne ony dızel otynynan tabıǵı gazǵa aýystyrý máselesi qatań túrde pysyqtalýda. 2022 jylǵa qaraı kólik sektorynyń tabıǵı gazdy tutynýyn on esege ulǵaıtý boljanyp otyr. Bul úshin avtomatty jáne krıogendi gaz toltyrý stansııalar jelisin keńeıtý jobalary iske asyrylatyn bolady. Osy kórsetkishterge qol jetkizý zııandy zattardyń shyǵarylýynyń tómendeýine, jumys oryndaryn kóbeıtýge jáne otyn shyǵyndaryn neǵurlym únemdeýge aıtarlyqtaı áser etedi.
Qazaqstanda motor otyny retinde tabıǵı gazdy damytýǵa jáne avtomobıl gaz toltyrý kompressorlyq stansııalaryn salýǵa «QazTransGaz» AQ-nyń enshiles kásiporny bolyp tabylatyn «QazTransGaz О́nimderi» JShS jetekshilik etedi.