Búginginiń toıynda ózgeris kóp, negizinde babalardan qalǵan salt-dástúrlerimiz jatqanymen zamanaýı reńk pen kózqaras basym. Osy oraıda Túrkistan oblystyq Ádet-ǵuryp jáne salt-dástúr ortalyǵy men Arys aýdandyq mádenıet úıi ıgi jobany qolǵa alyp, toıshyl qaýymǵa tyń usynys jasap otyr.
Usynys qoldaý tabar, al bizge umyt bolyp bara jatqan ulttyq qundylyqtarymyzdyń ulyqtalǵany unady. Kezinde ózi kýá bolǵan aǵa býynnyń «Túıemuryndyq» salt - dástúriniń mańyzy men máni esinde shyǵar. Al jastarǵa beımálimdeý. Arys aýdanynda «Túıemuryndyqty» qaıta jańǵyrtyp, qoldanysqa engizý maqsatynda mádenı is-shara ótti. Túıe qomdalyp, úlkender bata berip, jastar seıil quryp, qyz syńsyp, uzatyldy. Bul kóriniske Arys aýdanynyń turǵyndary da qýana atsalysty. «Meniń oıymsha, bul dástúr qazirgi qoǵamǵa aýadaı qajet. Kóbine qalanyń aýmaǵynda túıe men jylqyǵa otyryp, óz jurtymen qoshtasýǵa múmkindik bola bermeýi múmkin. Biraq, atalǵan ǵurypty zamanaýı túrde qoldanysqa engizýimizge ábden bolady», - deıdi oblystyq Ádet-ǵuryp jáne salt-dástúr ortalyǵynyń dırektory Jánibek Taǵaev.
«Túıemuryndyq» — uzatylyp jatqan qyz kóshiniń jolynda otyrǵan aýyldyń adamdary kerýen atynyń noqtasynan, ne túıesiniń buıdasynan ustap turyp suraıtyn kádesi. Qyz anasy olarǵa kádesin jasaıdy, syı alǵandar baqyt tileı batasyn berip, rızashylyǵyn bildirip tarasady. Aýyl ardagerleriniń aıtýynsha, «Túıemuryndyq» bergende qyzdyń tórkini qudalarǵa qyzdy ǵana emes, túıeni de beredi. Al botasyn ózderi alyp qalady eken. Araǵa jyldar salyp, qyzy kúıeýbalamen birge úıine balasyn kóterip kelgende, botany nemeresine básire retinde berip jiberetin bolǵan.
Iá, búginde elimizdegi úılený nemese basqa da toılarda dańǵazalyq pen ysyrapshyldyq basym ekeni jıi aıtylyp júr. Tipti kúni keshe Senat tóraǵasy Qasym-Jomart Toqaev jaýyr bolǵan ataqqumarlyq ysyrapshyldyqtan, sán-saltanattan qutylatyn jańa úlgi, ózbekter, túrikter, túrikmenderdiń úlgileri boıynsha ulttyq salt-dástúrge den qoıý qajettigin aıtty. Arystaǵy mádenı is-sharany uıymdastyrýshylar da qazaqylyqtyń qaımaǵy buzylmaǵan óńirde osy bir ulttyq salt-dástúrdiń qaıta jańǵyrǵanyn qalaıdy.
Ǵalymjan ELShIBAI,
«Egemen Qazaqstan»
Túrkistan oblysy