Qazaqstan jastarynyń kongresi «Rýhanı jańǵyrý» jobasy aıasynda elimizdegi eń belsendi jastar arasynan aldyńǵy qatarly 7 azamatty anyqtamaq. Uıymdastyrýshylar bul jóninde «Qazmedıa» ortalyǵynda ótken brıfıngte málimdep, jastardy sharaǵa belsendi qatysýǵa shaqyrdy.
Kongress jastary Aqparat jáne kommýnıkasııalar, sondaı-aq Qoǵamdyq damý mınıstrlikterimen birlese otyryp jarııalaǵan jańa joba «7 jalyn» ataýymen júzege asady. Onyń maqsaty – Qazaqstan boıynsha tabysty, básekege qabiletti, bilim kýltin nasıhattap júrgen 18 ben 29 jas aralyǵyndaǵy 7 jasty iriktep, olardyń qoǵam damýyna qosqan úlesin úlgi etý. Irikteý 17 qyrkúıek pen 15 qazan aralyǵynda ótkiziledi.
Brıfıngke Májilis depýtaty Gennadıı Shıpovskıh, Qoǵamdyq damý mınıstrligi Jastar jáne otbasy komıteti tóraǵasynyń mindetin atqarýshy Ashat Oralov, «Qazaqstan jastary kongresi» atqarýshy dırektory Toqtar Bolysov, qoǵam qaıratkeri Baqyt Syzdyqova, «Qazaqstannyń 100 jańa esimi» jobasynyń byltyrǵy jeńimpazy Ernur Rysmaǵanbetov, «Qazaqstan» telearnasynyń júrgizýshisi Irına Ten jáne respýblıkalyq jastar uıymdarynyń basshylary qatysty.
«7 jalyn» bes kezeńnen turady. Joba 17 qyrkúıek kúni bastalyp, oǵan 30 qyrkúıekke deıin ótinim qabyldanady. О́tinishti jastar uıymdary, jastar resýrstyq ortalyqtary, úkimettik emes uıymdar jáne óz atynan belsendi jastar jibere alady. Olar 1-5 qazan aralyǵynda qarastyrylyp, 15 qazanda jeńimpazdar resmı túrde jarııalanady. Iriktelgen 7 jalyndy jeńimpaz «Qazaqstan jastarynyń kongresi» atynan «Qazaqstannyń 100 jańa esimi» jobasyna usynylmaq.
Venera TÚGELBAI,
«Egemen Qazaqstan»