«Halyqaralyq eńbek uıymy» keltirgen aqparat boıynsha, sońǵy 20 jyl ishinde álemde jastar sany 139 mln adamǵa artyp otyr. Bul týraly Qoǵamdyq damý mınıstri Darhan Káletaevtyń baıandamasynda keńinen aıtyldy.
Jastardy áleýmettendirý jáne jumyspen qamtý boıynsha jol kartasynyń jobasymen tanystyrǵan mınıstr, bizdiń elde jumyssyz jastardyń sany jyl saıyn kemip keletinin tilge tıek etti. Oǵan mysal, 14 pen 29 jas aralyǵyndaǵy jumyssyz jastardyń úlesi 2001 jyly 18,6 prosentti qurasa, bıylǵy kórsetkish boıynsha jumyssyzdyń deńgeıi 7,7 prosentke deıin kemigen.
Jumyssyzdyq deńgeıiniń tómendeý kórsetkishin Bilim jáne ǵylym mınıstri Erlan Saǵadıev te rastap, 2015 jylmen salystyrǵanda jastar arasyndaǵy jumyssyzdyq 4,2 prosentten 2017 jyly 3,8 prosentke deıin kemigenin jetkizdi. Onyń aıtýynsha, osyndaı nátıjege qol jetkizýge «Jumyspen qamtýdyń jol kartasy–2020», «Jasyl el», «Dıplommen aýylǵa!», «Jastar praktıkasy», «Máńgilik el jastary – ındýstrııaǵa! (Serpin)» sekildi jáne taǵy basqa áleýmettik baǵdarlamalar men jobalar muryndyq bolyp otyr. Mysaly, 2014 jyldan bastap iske asyrylyp keletin «Serpin» jobasy aıasynda 9 oblystaǵy 26 joǵary oqý oryndarynda 12 344 stýdent jáne 7 óńirde 37 kolledjde 2276 stýdent bilim alýda. Ásirese, áleýmettik jaǵynan az qamtylǵan jáne de kóp balaly otbasylarynan shyqqan balalar atalǵan joba arqyly óz biliktilikterin arttyrýǵa múmkindik alyp otyr. Buǵan qosa ótken jyldan bastap barshaǵa arnalǵan tegin tehnıkalyq-kásiptik bilim berý jobasy iske asyrylýda. Joba sheńberinde kolledjderde memlekettik bilim berý tapsyrysy 54 prosentke deıin kóbeıdi.
Eńbek jáne halyqty áleýmettik qorǵaý mınıstri Madına Ábilqasymova óz baıandamasynda 2018 jylǵy II toqsannyń qorytyndysy boıynsha jastar arasyndaǵy jumyssyzdyq deńgeıi 3,8 prosenti quraıtynyn jetkizdi. Bul degenimiz búgingi kúni 82,4 myń adam jumyssyz retinde tirkelip otyr degen sóz. Al jumyspen qamtylǵan jastardyń jalpy sany 2,1 mln adam.
Onyń ishinde 1,5 mıllıony jaldamaly jumyskerler bolsa, al 456 myńy ózin-ózi jumyspen qamtyǵandar qataryna jatady. Elimizdegi jastardyń 36 prosenti joǵary bilimi, 39 prosenti arnaıy orta bilim alǵan. Al qalǵan 25 prosent negizgi bilim alǵan jastarǵa tıesili bolyp otyr. Búgingi kúngi kórsetkish boıynsha elimizde jyl saıyn 21 myńnan astam adam tehnıkalyq jáne jumysshy kásipterine oqytylady.
Erkejan AITQAZY,
«Egemen Qazaqstan»