Memleket basshysy N.Nazarbaevtyń «100 naqty qadam» Ult josparynyń 80-qadamyn iske asyrý baǵytynda mindetti áleýmettik medısınalyq saqtandyrý júıesin engizý boıynsha Aqmola oblysynda da aýqymdy sharalar atqarylýda.
«Áleýmettik medısınalyq saqtandyrý qory» kommersııalyq emes aksıonerlik qoǵamy Aqmola oblystyq fılıalynyń deregi boıynsha, 2017 jyldyń 1 shildesinen bastap, 2018 jyldyń 6 tamyzy aralyǵynda aqmolalyqtar mindetti áleýmettik medısınalyq saqtandyrýǵa 3,1 mıllıard teńgeden astam qarjy salǵan. Onyń ishinde 2,8 mıllıard teńgesi (89,4 paıyzy) jumys berýshiniń úlesinde bolsa, 333,6 mıllıon teńge (10,6 paıyzy) jeke kásipkerler men jeke tulǵalardyń jáne azamattyq-quqyqtyq boıynsha kelisimshart arqyly jumys isteıtinderdiń úlesinde. Oǵan qosa, áleýmettik medısınalyq saqtandyrý jarnasyn ýaqytyly aýdarmaǵan jumys berýshiler tarapynan qordalanǵan qaryzdyń ósimpuly da bar. Jalpy, oblys boıynsha atalǵan merzim ishinde ósimpul somasy 8,6 mıllıon teńgeni quraǵan.
Aıtalyq, «Áleýmettik medısınalyq saqtandyrý týraly» Zańyna sáıkes, ýaqtyly tólenbegen jarna memlekettik kirister organdarymen óndirilip alynady jáne tólem jasaýshy keshiktirilgen ár kún úshin qor esebine Qazaqstan Respýblıkasynyń Ulttyq banki belgilegen 1,25 resmı stavka kóleminde ósimpulymen birge tóleýge mindetti. Osy kúnge deıin áleýmettik medısınalyq saqtandyrý jarnasyn artyq tóleý nemese tólem jasaý kezinde qatelikke jol berý de oryn aldy. Bıylǵy jyldyń birinshi jartyjyldyǵynda qordyń fılıalyna 26 kásipker shaǵymdanyp, qatelesip artyq tólem jasaǵanyn aıtqan. Olardyń artyq jasalǵan tólemderin qaıtaryp berýge kómek kórsetildi.
Baıqal BAIÁDIL,
«Egemen Qazaqstan»
Aqmola oblysy