2019 jyldyń 2-12 naýryzy aralyǵynda Reseıdiń Krasnoıarsk qalasynda kúlli álemniń sportty serik etetin asa daryndy stýdentteriniń basyn qosatyn XXIX Dúnıejúzilik qysqy Ýnıversıadanyń ótetini belgili.
Búgin Italııanyń Týrın qalasynda aıtýly jarystyń alaýy tutanady. 24 qyrkúıekte ol XXVIII Dúnıejúzilik qysqy Ýnıversıadanyń astanasy bolǵan Almaty qalasyna jetedi. Alaý estafetasy Abaı kóshesiniń boıyndaǵy Balýan Sholaq atyndaǵy sport saraıynan bastalyp, Respýblıka saraıyna deıin jalǵasady. Alqyzyl alaýdy tanymal sportshylar men joǵary oqý oryndarynyń rektorlary alyp júretin bolady. Arada eki táýlik ótkennen soń saltanatty sherý Qytaıdyń Harbın qalasynda jalǵasady. Al 29 qyrkúıekte alaý Reseıge jetkiziledi. Sol kúnnen bastap, kelesi jyldyń 1 naýryzyna deıin jalǵasatyn alaý estafetasy atalmysh eldiń eń iri 30 qalasyn aralap, aqyrynda Krasnoıarskini betke alady.
Krasnoıarskide ótetin Ýnıversıadada álemniń 50-den asa memleketinen 3 myńǵa tarta sportshylar baq synaıdy dep kútilýde. Stýdentter 11 sport túrinen 76 medal jıyntyǵyn sarapqa salady.
Ǵalym SÚLEIMEN,
«Egemen Qazaqstan»
ALMATY