Qurlyqtyq hokkeı lıgasynda (QHL) kúsh synasyp júrgen «Barys» kezekti týrdy óz muz aıdynynda ótkizip, Ombynyń «Avangard» klýbynan 3:4 esebimen utyldy.
Kezdesýdi qonaqtar óte qarqyndy bastady. Alǵashqy kezeńdi olar bizdiń qaqpamyzǵa qatarynan úsh shaıba salyp, jergilikti hokkeıshilerdi biraz ábigerge saldy – 0:3. Eger oıyn osylaı jalǵasa beretin bolsa, abyroıdan jurdaı bolatyndaryn túsingen «Barystyń» bas bapkeri Andreı Skabelka qaqpashy Domınık Grahovınany Sergeı Kýdrıavsevpen almastyrdy. Onyń bul sheshimi ońdy boldy. Úzilisten keıin astanalyqtardyń oıyny júrdi. Andre Petersson men Brendon Bochenskı esep aıyrmashylyǵyn qysqartty – 2:3. Úshinshi kezeńde Roman Starchenko tarazy basyn teńestirdi – 3:3. Qosymsha ýaqytta qos komanda qansha jantalasqanymen, tablodaǵy esep ózgergen joq. Al býllıt soǵý barysynda «Avangard» oıynshylarynyń baǵy jandy. Qorytyndy esep – 3:4.
Osy kúnge deıin 7 kezdesý ótkizip, 9 upaıdy qorjynǵa salǵan «Barys» qazirgi kezde KHL-dyń turaqty birinshiliginiń týrnır kestesinde 11 orynǵa taban tirep tur. Endi jerlesterimiz ózderiniń kelesi kezdesýin 22 qyrkúıekte Ýfada «Salavat Iýlaevqa» qarsy ótkizedi.
Ǵalym SÚLEIMEN,
«Egemen Qazaqstan»