Shymkenttegi Muhammed Haıdar Dýlatı atyndaǵy № 8 mektep-gımnazııasynda Sherhan Egizbaev atyndaǵy jas ekonomıster saıysy ótti. Mektep qabyrǵasynda ótken bul is-sharanyń negizinde naryqtyq ekonomıkanyń zańdary jaıly bilimderin jetildire otyryp, oqýshylardyń oılaý, shyǵarmashylyq qabiletin damytý maqsaty jatqany málim. Oqýshylardyń boıyna yjdaǵattylyq pen senimdilikti uıalata otyryp, materıaldyq jáne rýhanı qundylyqty boıyna sińirgen, básekege qabiletti tulǵa tárbıeleý de eskerilgeni anyq.
Al jarysqa qatysýshylar Elbasy N.Nazarbaevtyń «Básekege qabiletti qoǵam ornatýdyń negizi — bilimde» degen sózi jadynda ekenin jaqsy ańǵartty. Úshinshi ret uıymdastyrylyp otyrǵan bilim jarysy bıyl alǵash ret halyqaralyq deńgeıge kóterildi. Shymkenttegi bilim jarysy jóninde ǵalamtor arqyly habardar bolǵan, Reseıdiń Belgorod, Lıpesk jáne Novosıbırsk qalalarynda turatyn jasóspirimder qatysýǵa ótinishterin jiberipti. Iаǵnı, olar jarysqa vırtýaldy túrde, ǵalamtor arqyly qatysty. Al oqýshylar sheshetin esep bilikti mamandardyń qatysýymen qurylǵan. Suraqtarǵa berilgen jaýapty komıssııa emes, kompıýter baǵalady. Durys, burysyn anyqtaıtyn baǵdarlamany da sol jarysqa qatysatyn jasóspirimderdiń ózderi jasaǵan. Osydan-aq qatysýshy jastardyń bilim deńgeıi joǵary ekenin ańǵarasyz.
Joǵaryda halyqaralyq jarys Sherhan Egizbaev atynda ekenin aıttyq. 26 jasynda ómirden ótken Sherhan Muqanuly Muhammed Haıdar Dýlatı atyndaǵy № 8 mektep-gımnazııasynyń túlegi. Qysqa da jarqyn ǵumyrynda bıik belesterdi baǵyndyrǵan jas daryn birneshe halyqaralyq olımpıadalarda júldeger atandy. Álemniń úzdik bilim ordalarynda bilim aldy. Az ýaqytta óziniń bilimdi ekonomıst ekenin kórsetti. Investısııa jáne damý mınıstrliginde jaýapty qyzmetke shaqyrylyp jáne ony minsiz atqardy. Ǵylymı ataǵyn da qorǵap úlgergen Sherhan ustazdary men dostarynyń jadynda bilim óte qushtar, sportqa jaqyn, ashyq - jarqyn minezdi azamat retinde de qalary sózsiz.
Jasyndaı jarqyrap ótken Sherhan Egizbaev atyndaǵy jas ekonomısterdiń halyqaralyq jarysyna 13 komanda qatysty. Bas júldeni reseılik oqýshylar jeńip aldy. Al 1-oryndy Sherhannyń ózi bilim alǵan № 8 gımnazııanyń «Legion» toby ıelendi. Ekinshi orynǵa № 41 mektep- lıseıdiń «West» komandasy, úshinshi orynǵa № 1 mekteptiń «WinWin» toby men № 84 mekteptiń «Baiterek» toby jáne Lıpesk qalasynan qatysqan «Ekohaıp» komandasy ıe boldy. Jeńimpazdar men júldegerlerge arnaıy syılyqtar tabys etildi.
Ǵalymjan ELShIBAI,
«Egemen Qazaqstan»
Shymkent.