Maqtaaral aýdanynyń ákimi Baqyt Asanov Iirjar aýyldyq okrýgi «Dıqan» aýylyndaǵy 600 oryndyq Qajymuqan atyndaǵy jalpy orta mektebiniń qurylys barysymen tanysty, dep habarlaıdy Maqtaaral aýdany ákiminiń baspasóz qyzmeti.
Merdiger «Korporasııa Sıtı Stroı» JShS-i quryp jatqan nysannyń jalpy quny 1 mıllıard 107 mıllıon teńgeden astam. О́ńir basshysy nysan qurylysynyń óndiristik jumys kestesine sáıkes júrgizilýin tekserip, birneshe kemshilikterdi anyqtady. Sondaı-aq, aǵymdaǵy jyldyń jeltoqsan aıynda paıdalanýǵa beriletin nysandy óz ýaqytynda tapsyrý jáne oryn alyp jatqan kemshilikterdi dereý túzetý úshin merdiger mekemeniń basshysyna arnaıy tapsyrma berdi.
«Maqtaaral aýdanynda qazirgi tańda 3 mekteptiń jáne 2 emhananyń qurylysy júrip jatyr. Biz jańa aýdanda bilim salasyna jaǵdaı jasaý úshin mektep salýdy toqtatpaımyz. Sondaı-aq, aýdan ortalyǵynda kóp qabatty turǵyn úılerdi turǵyzatyn jerlerdi anyqtaýdamyz. Memlekettiń altyn qory sanalatyn sýarmaly jerlerimizdi saqtap, halqy tyǵyz ornalasqan maqtaly ólkede kóp qabatty turǵyn úılerdiń, áleýmettik nysandardyń sanyn kóbeıtýimiz kerek. Osylaısha kıeli Maqtaaraldy aýyl sharýashylyǵymen ǵana emes, qurylys salasymen de tanymal etetin bolamyz» - dedi Baqyt Násirhanuly.
Jalpy Maqtaaral aýdanynda bıyl 4 mektep paıdalanýǵa berilse, taǵy 3 mekteptiń qurylysy júrip jatyr. Qajymuqan atyndaǵy jalpy orta mektepten bólek, qurylysy júrip jatqan Q.Úkibaev atyndaǵy 300 oryndyq jáne Q.Qaısenov atyndaǵy 300 oryndyq mektepter kelesi jyly paıdalanýǵa beriledi dep kútilýde.
Aıta keteıik, Myrzakent pen Atakent kentterinde 250 oryndyq 2 emhananyń boı kóterýi de maqtaly ólkede qurylys salasynyń qarqyndaǵanyn kórsetedi.