Basqosýda jer qatynastary salasynda zańdylyqty saqtaý máseleleri, sondaı-aq bilim berý isinde bıýdjet qarajatyn tıimdi paıdalanýdy qamtamasyz etý úshin qabyldanyp jatqan sharalar talqylandy.
Bas prokýratýranyń, Memlekettik qyzmeti isteri jáne sybaılas jemqorlyqqa qarsy is-qımyl agenttiginiń, Respýblıkalyq bıýdjettiń atqarylýyn baqylaý jónindegi esep komıtetiniń, Aýyl sharýashylyǵy, Bilim jáne ǵylym mınıstrlikteriniń baıandamalary tyńdaldy.
Jıyndy ashqan Gúlshara Ábdiqalyqova sybaılas jemqorlyqqa qarsy is-qımyl Qazaqstanda memlekettik saıasattyń mańyzdy strategııalyq basymdyǵy retinde qarastyrylatynyn aıtty. Elbasy N.Á.Nazarbaev Qazaqstan halqyna arnalǵan qańtardaǵy Joldaýynda sybaılas jemqorlyqpen kúresti jalǵastyrý qajettigin beker atap ótken joq.
Jer qatynastary sybaılas jemqorlyq beleń alǵan salanyń biri bolyp sanalatynyn tájirıbe kórsetip otyr. Tek sońǵy eki jarym jyl ishinde bul sala boıynsha sybaılas jemqorlyqqa qarsy qyzmet 457 qylmysty tirkegen. 78 adam sottaldy. Prokýrorlyq tekseris nátıjesi boıynsha, jer qatynastaryn retteıtin zańnamany buzǵany úshin 342 adam túrli jaýapkershilike tartyldy, sonyń ishinde 25 qyzmetshi memlekettik qyzmettiń bedeline nuqsan keltirgeni úshin jaýapty boldy. Osyǵan baılanysty múddeli memlekettik organdardyń nazary jer týraly zańnamany, jeke baspana qurylysy úshin jer telimderin berý kezindegi kezektilik tártibin jáne memlekettik qyzmet kórsetý merzimin saqtaý, kommersııalyq jerlerdi aýksıonsyz ıelenýge jol bermeý qajettigine aýdaryldy.
Memlekettik hatshy bilim berý isin qarjylandyrýǵa memleketten mol qarjy bólinip otyrǵanyna toqtaldy. Sonymen qatar, 2016 jyldan beri bul salada sybaılas jemqorlyqqa qatysty 510 qylmys tirkelip, 178 adam sottalǵan. Áleýmettik saýalnamalar joǵary oqý oryndaryndaǵy bilim berý isinde, mektepke deıingi mekemelerdegi balalarǵa oryn bólý barysynda sybaılas jemqorlyq deńgeıi joǵary ekenin kórsetedi.
Talqylaý nátıjesi boıynsha Komıssııa ókiletti memlekettik organdarǵa anyqtalǵan zań buzýshylyqtarǵa qatysty taldaý júrgizý jáne qylmystyń aldyn alatyn tıisti tetikter ázirleý úshin sharalar qabyldaý jóninde tapsyrma berdi.
Sońynda G.Ábdiqalyqova elimizde sybaılas jemqorlyqsyz quqyqtyq memleket qalyptastyrý úshin júrgizilip jatqan reformalar Qazaqstan Respýblıkasynyń 2025 jylǵa deıingi strategııalyq damý josparynyń basty mindetterine qol jetkizýge baǵyttalýy kerek ekenin aıtty. Bul – jedel ári sapaly ekonomıkalyq ósim jáne halyqtyń ál-aýqatyn arttyrý.