Keshe Prezıdent Is basqarmasy Medısınalyq ortalyǵynyń aýrýhanasynda «Enteroskopııa, endoskopııalyq ýltradybystyq zertteý jáne endoskopııalyq retrogradtyq holangıopankreatografııa erekshelikteri» atty sheberlik synyby ótti.
Izraıldegi Beılınson medısınalyq ortalyǵynyń gastroenterolog- endoskopısti Vıoletta Gabovıch elorda dárigerlerine endoskopııalyq ýltradybystyq zertteý (ÝDZ) arqyly asqazan-ishek jáne uıqy bezi men ót joldaryndaǵy isikterdi, enteroskopııamen ash ishektegi isikterdi anyqtaý, sondaı-aq oǵan sol mezette operasııa jasaý ádisin úıretti.
Prezıdenttik klınıka dárigerleri endoskopııalyq dıagnostıkanyń barlyq zamanaýı ádisterin ıgergen. Ash ishekti zertteý enteroskopııasy elimizde tuńǵysh ret osy aýrýhanada bir aı buryn júzege asqan bolatyn. Az ýaqyt ishinde osy ádispen 23 zertteý júrgizilgen. Endoskopııalyq ýltradybystyq zertteý de osy klınıkada alǵash ret jasalyp jatqan endoskopııalyq dıagnostıkanyń bir túri. Prezıdenttik klınıkadaǵy zamanaýı jabdyqtar zertteýlerdiń osy túrin kúndelikti júrgizýge múmkindik týǵyzyp otyr. Al endoskopııalyq retrogradtyq holangıopankreatografııa bolsa asqyný qaýpi joǵary, kúrdeli hırýrgııalyq prosedýra.
Sheberlik synybyn júrgizgen sheteldik dáriger atalǵan ádisterdi bir mezette oryndaýdy tájirıbe júzinde kórsetti. «Qazirgi ýaqytta adamdar asqazan-ishek, uıqy bezi men ót joldary jáne ash ishek aýrýlaryna jıi shaldyǵady. Olar osy ádis-tásildi qajet etedi. Búgin kórsetilip jatqan ádis arqyly osy organdardaǵy isikterden analız alyp, túrin anyqtaýǵa bolady. Sondaı-aq jylaýyq túrindegi jáne qatersiz isikterdi sol mezette endoskopııalyq jolmen alyp tastaýǵa múmkindik bar. Buǵan deıin naýqastar shetelge baryp tekseriletin. Bolmasa naýqas kompıýterlik tomografııa arqyly isiktiń túrin anyqtap, hırýrgııalyq ashyq operasııa jasatýǵa májbúr edi. Tilik jasalatyn hırýrgııalyq operasııadan keıin pasıent bir apta boıy aýrýhanada jatatyn. Onda asqynýlar da kóp kezdesetin. Al 30 mınýttan bir saǵatqa deıin sozylatyn bul ádispen bir mezette dıagnostıkany jasap, operasııany da istep, sol kúni naýqasty úıine qaıtarýǵa da múmkindik alyp otyrmyz», deıdi Prezıdent Is basqarmasy Medısınalyq ortalyǵynyń aýrýhanasynyń dárigeri Jeńisbek Tynykózıev.
Maıgúl SULTAN,
«Egemen Qazaqstan»