Dýshanbede Táýelsiz memleketter dostastyǵyna (TMD) múshe memleketter basshylarynyń kezekti otyrysy ótip jatyr.
Jıyndy ashqan Tájikstan Prezıdenti Emomalı Rahmon uıym aıasynda yntymaqtastyqty nyǵaıtý úshin aýqymdy sharalar atqarylǵanyn atap ótti. E.Rahmon osyndaı jıynnyń uıymǵa múshe memleketter arasyndaǵy qarym-qatynasty nyǵaıtyp, damyta túsetinin málimdedi.
«Birlesken jumystyń nátıjesinde jańa qujattar ázirlendi. Budan bólek, TMD aıasyndaǵy yntymaqtastyqtyń barlyq salalaryn qamtıtyn sheshimder qabyldandy. Aıta ketken jón, bizdiń tóraǵalyǵymyz kezinde salalyq keńesterdiń qyryqqa jýyq otyrystary uıymdastyryldy. Biz ekstremızmge jáne terrorızmge qarsy kúres, esirtkiniń zańsyz aınalymy, ekonomıkalyq qylmystar, zańsyz kóshi-qon, adam saýdasy sekildi baǵyttarǵa basymdyq berdik», dedi E.Rahmon.
TMD-ǵa múshe memleketter basshylarynyń kezekti otyrysyna Elbasy Nursultan Nazarbaev qatysyp otyr. Sonymen qatar jıynǵa Reseı Prezıdenti Vladımır Pýtın, Belarýs prezıdenti Aleksandr Lýkashenko, Ázerbaıjan Prezıdenti Ilham Alıev, Qyrǵyzstan Prezıdenti Sooronbaı Jeenbekov, Armenııa Premer-mınıstri Nıkol Pashınıan, Moldova Prezıdenti Igor Dodon jáne О́zbekstan Prezıdenti Shavkat Mırzııoev, Túrikmenstannyń atynan memleket qaıratkeri Pýrlı Agamýradov keldi.
Aıta ketý kerek, Qyrǵyzstan basshysy S.Jeenbekov pen Armenııa Premer-mınıstri N.Pashınıan tuńǵysh ret qatysyp otyr.
Jıyn barysynda TMD atqarý komıtetiniń Tóraǵasy Sergeı Lebedov kún tártibindegi máselelerdi tanystyrdy.
Budan keıin otyrys shaǵyn quramda, jabyq úlgide ótedi. Al keńeıtilgen quramdaǵy basqosýda TMD aıasyndaǵy ózara áriptestikti nyǵaıtýǵa jáne damytýǵa qatysty birqatar máseleler sóz bolady. Talqylanatyn taqyryptar qatarynda Adam quqyqtary jónidegi jalpyǵa ortaq deklarasııanyń qabyldanǵanyna 70 jyl tolýyna oraı TMD-ǵa múshe memleketter basshylarynyń sheshimine qatysty qujat bar.
Sonymen qatar Ekinshi dúnıejúzilik soǵystyń aıaqtalǵanyna 75 jyl tolý mereıtoıyn keń kólemde atap ótý jospary sekildi birqatar qujattar rásimdeledi. Keńes qorytyndysy boıynsha 15-ke jýyq qujatqa qol qoıylmaq.
Keńes barysynda TMD-ǵa tóraǵalyq etý mindetin Túrikmenstan tarapyna resmı túrde tapsyrý josparlanǵan.
Abaı ASANKELDIULY,
"Egemen Qazaqstan" - Dýshanbeden