О́tken jyly óńirge tartylǵan 482 mlrd. teńge ınvestısııanyń 129 mlrd. teńgesi óńdeý ónerkásibiniń úlesinde, ıaǵnı 2,5 esege ulǵaıǵan. Bul kórsetkish aldaǵy ýaqytta óse túseri anyq.
Olaı deıtinimiz, Túrkistan qalasynda ótip jatqan «Kóne Túrkistan – jańa múmkindikter» atty halyqaralyq ınvestısııalyq jəne týrıstik forým jańa kelisimderge jol ashatyny kámil. Forýmǵa Eýropa elderinen, Túrkııa, Reseı, Ońtústik Koreıa, Qytaı, Sıngapýr, Iran, Malaızııa, Pákistan, О́zbekstan syndy basqa da memleketterden 250-den astam delegat qatysýda. О́ńirdiń damýy jáne ınvestısııalyq tartymdylyǵy jóninde baıandama jasaǵan Túrkistan oblysynyń ákimi Janseıit Túımebaev óńirde shaǵyn jáne orta kásipkerlik jaqsy damyǵanyn atap ótti. Investısııa tartý maqsatynda Túrkistan qalasynda «TURKISTAN» arnaıy ekonomıkalyq aımaǵyn qurý jumystary josparlanǵan. Bul aımaqta kásipkerlerge 25 jylǵa deıin salyq tóleýde jeńildikter qarastyrylmaq. «Túrkistan – talaı jyldar boıy qazaq handyǵynyń jáne túrki áleminiń saıası ordasy, rýhanı astanasy bolǵan shahar. Elbasymyz osynaý kóne qalany oblys ortalyǵy etip, ony damytýǵa erekshe yqylas tanytyp otyrǵany belgili. Búginde memleket tarapynan jalpy quny 2 mlrd. AQSh dollaryn quraıtyn ınvestısııa quıý josparlanyp otyr. Iаǵnı, munda áýejaı, ákimshilik - iskerlik ortalyǵy jáne turǵyn úıler boı kóterip, Túrkistan zamanaýı úlgidegi tehnologııa engizilgen aqyldy qalaǵa aınalatyny sózsiz. Qazirdiń ózinde óńirdiń ekonomıkalyq damý múmkindigine qanyqqan otandyq jáne túrik kompanııalary 100 mln. AQSh dollarynan asatyn qarjy salyp, 5 juldyzdy qonaq úıler, oıyn-saýyq saýda oryndary men fıtnes ortalyqtar ashýdy kózdep otyr», – dedi oblys ákimi.
Forýmda Eýrazııalyq ekonomıkalyq yntymaqtastyq uıymynyń bas hatshysy Vladımır Pıskýrev Túrkistannyń týrızm salasyndaǵy múmkindigin joǵary baǵalasa, «DALHolding» kompanııasynyń basshysy Demırdjan Kose Túrkistan oblysynda 200 gektar jylyjaı men sement zaýytyn ashýǵa daıyn ekenin málimdedi. Al, Malaızııanyń «Nagasteel Equipment Sdn. Bhd.» kompanııasynyń prezıdenti Zaınýl Azızan ınfraqurylym jáne ónerkásip salalaryna ınvestısııa quıýǵa ázir ekenin aıtty. Sondaı-aq «RIXOS HOTELS» qonaq úıler jelisiniń prezıdenti Fetah Tamındjı, Eýrazııalyq týrızm assosıasııasynyń prezıdenti Rysty Qarabaeva, «Qazaq týrızm» ulttyq kompanııasynyń basqarma tóraǵasy Rashıd Kúzembaev jáne ózge de spıkerler baıandama jasap, keleshekte Túrkistandy týrızm kóshbasshysyna aınaldyrý baǵytyndaǵy oılarymen bólisti.
Sonymen qatar, qatysýshylar V2V formatyndaǵy kezdesýlerde «Týrızm ındýstrııasy — Qazaqstan ekonomıkasynyń jańa draıveri», «Soltústik-Ońtústik ekonomıkalyq dálizi» taqyryptarynda jáne agroónerkásip keshenin damytýdaǵy adam kapıtalynyń róli jóninde pikir almasty.
Ǵalymjan ELShIBAI,
«Egemen Qazaqstan»
Túrkistan oblysy