28 qyrkúıek kúni «Atameken» QR Ulttyq kásipkerler palatasy Dúnıejúzilik týrızm kúnine oraı www.atameken.kz saıtynda «Legends of Kazakhstan» men «Týrızmdegi tulǵalar» jobalary bastalatyny týraly málimdeme taratty.
Osy oraıda, «Atameken» QR UKP Tóralqa Tóraǵasy Tımýr Qulybaevtyń óńirlerge barǵan jumys saparlarynda Qazaqstanda týrızmdi damytýǵa zor áleýet baryn jáne sol múmkindikti bıznes mindetti túrde paıdalanýy kerek ekenin birneshe ret aıtqanyn alǵa tarta ketýge bolady.
Tóralqa Tóraǵasy jappaı týrızmdi damytý úshin zamanaýı sheshimder qajettigin aıtady. Máselen, bul baǵytty kópshilikke saýatty tanystyrý úshin jumysqa tarıhshylar, etnograftar, mádenıettanýshylar, marketologtar men dızaınerlerdi tartqan jón.
Osy oraıda «Atameken» QR UKP týrıstik nysandar men tarıhı jerlerdi nasıhattaý maqsatynda «Legends of Kazakhstan» jobasyn júzege asyrýda.
«Joba elimizdiń túkpir-túkpirinen 250 ańyz ben dastandy biriktirip otyr: bul halyq aýyz ádebıeti jáne ańyzdar, tabıǵat eskertkishteri men tarıhı oqıǵalar, etıologııalyq ańyzdar men kıeli oryndar jaıynda keń aqparat. Bul joba sýretter jáne jańa nysandarmen tolyqtyrylatynyn eskergen jón», – dedi UKP Týrızm departamentiniń dırektory Qarlyǵash Altaeva.
Barlyq materıaldar ashyq qoldanysta berilgen, olardy týrıstik naryqtyń múddeli qatysýshylary Qazaqstannyń týrıstik ónimderin nasıhattaý men taratý maqsatynda qajetinshepaıdalana alady. Týrısterdiń yńǵaıyna «Týrıst kúntizbesi» jarııalandy, onda Qazaqstanda ótetin iri is-sharalardyń kúni belgilengen.
«Týrızmdegi tulǵalar» jobasy Qazaqstan týrızm naryǵynyń kásibı oıynshylaryn anyqtaýǵa jáne sala qatysýshylarynyń aqparatpen qamtylýyn arttyrýǵa baǵyttalǵan.
«Týrızmdegi túlǵalar» elimizdiń barlyq óńirinen túrli salalardaǵy sarapshylar men kásipkerlerdi aıshyqtaıdy. Bular – týrıstik fırmalardyń jetekshileri, qonaqúı menedjerleri, tabysty restoratorlar, eksýrsııa gıdteri, kásibı birlestikterdiń ókilderi, belsendi qoǵam qaıratkerleri jáne sala damýyna úles qosqan basqa da kásibı mamandar.
Atalmysh bul joba joǵaryda atalǵan bastamalarmen shektelmeı, únemi jańa esimdermen jáne júzege asqan qyzyqty jobalarmen tolyǵyp otyrmaq.
Aınash ESALI,
«Egemen Qazaqstan»
ALMATY