О́tken jumada Almaty qalasyndaǵy Ulttyq kitaphanada «Jańarý» sybaılas jemqorlyqqa qarsy jalpyulttyq qozǵalysy» qoǵamdyq birlestiginiń uıymdastyrýymen «Qazaqstan Respýblıkasy zańnamasynyń sybaılas jemqorlyqqa qarsy saraptamasy: “Pro et antra” atty taqyrypta dóńgelek ústel ótti.
Elimizdegi memlekettik organdar men qoǵamdyq ınstıtýttardyń kúni búginge deıin normatıvtik shyǵarmashylyq salasynda jemqorlyqqa qarsylyq turǵysynda tıimdi sharalar, ádister men mehanızmder uıymdastyrýda belgili bir deńgeıde tájirıbe jınaqtaǵany anyq. Alaıda osy jetistikterdi baǵalaı kele, bul taraptaǵy áli de jetildire, tolyqtyra túsýdi talap etetin birqatar máseleler mamandardy birazdan beri tolǵandyryp keledi. Sondyqtan da, is júzindegi nátıjelerge taldaý júrgizýdi retteıtin erejelerdiń bolmaýy jáne osy isterdi júzege asyrýǵa bólinetin bıýdjettik qarajatty tıimdi paıdalanýdy muqııat qadaǵalaý sekildi taǵy da basqa ózekti máseleler tóńireginde keńinen áńgime qozǵaldy. «Jańarý» qoǵamdyq birlestiginiń tóraǵasy, memleket qaıratkeri Oralbaı Ábdikárimov dóńgelek ústel barysyndaǵy áńgimeniń negizgi baǵyttaryn júıelep, qonaqtarǵa kezek-kezegimen sóz berip, tanystyryp otyrdy.
Astanalyq memlekettik qyzmet salasyndaǵy aımaqtyq hab basqarý komıtetiniń tóraǵasy Álıhan Báımenov osy saladaǵy quqyqtyq normatıvtik aktilerge baılanysty birqatar máselelerge toqtaldy. EQYU-nyń Astanadaǵy keńsesiniń basshysy Saba Derd myrza jemqorlyqqa qarsy kúrestiń halyqaralyq mańyzy men tájirıbeleri týraly sóz qozǵasa, «Ekspertıza jáne jańa tehnologııalar ǵylymı-óndiristik ınstıtýty» JShS dırektory M.Sandarchýk arnaıy baıandama jasady. Dóńgelek ústelge QR Parlament májilisiniń arnaıy is-saparmen kelgen delegattary qatysyp otyrdy.
Nurǵalı ORAZ,
«Egemen Qazaqstan»