Shymkent qalasy Astana men Almaty sııaqty óziniń damý modelin ózgertip, jańa mindetterdi iske asyrýy qajet. Osyǵan baılanysty bolashaq Shymkenttiń strategııasyn ázirleý kerek
Elbasy Nursultan Nazarbaev Shymkent qalasynyń áleýmettik-ekonomıkalyq damý máselelerine arnalǵan keńeste osylaı dedi. Jumys sapary barysynda tańerteńnen qalany aralap, jasalyp jatqan jumystarmen tanysqan Elbasy úshinshi megapolısti damytýdyń naqty baǵyttaryn aıqyndap berdi.
Birinshiden, qala Ortalyq Azııada qýatty ekonomıkalyq ortalyqqa, qonaqtar úshin jaıly ári tartymdy megopılıske aınalýy tıis. «Salystyrmaly túrde aıtatyn bolsaq, irgeles jatqan Tashkent qalasynda halyqtyń sany eki jarym ese kóp bolǵanyna qaramastan, ol jaqta bir adamǵa shaqqandaǵy ónim kólemi bizden tómen. Tashkentte 3 500 dollar bolsa, Shymkentte - 5 100 AQSh dollary. Kórdińizder me? Eki esege kóp. Sondyqtan qalany iri ónerkásiptik, ınnovasııalyq, saýda-logıstıkalyq ortalyq retinde damytýdyń strategııasyn ázirleýimiz kerek. Bul baǵytta ınjenerlik-kóliktik ınfraqurylymdy damytqan jón. Sondyqtan men Úkimetke de, ákimshilikke de Shymkent qalasynyń qurylysy boıynsha 2023 jylǵa deıingi keshendi jospar qabyldaýdy tapsyramyn», - dedi N.Nazarbaev.
Ekinshiden, Shymkentte bolashaǵy bar ekonomıkalyq salalardy damytý qajet. Sonyń ishinde azyq-túlik, toqyma, qurylys materıaldary, farmasevtıka jáne taǵy basqa klasterler bar. Úshinshiden, jas mamandardy daıarlaý jumysyna basa nazar aýdarý qajet. О́ıtkeni, Shymkent turǵyndarynyń 42 prosenti - jastar. Iаǵnı, jergilikti oqý oryndarynyń mártebesin arttyryp, sheteldik ýnıversıtettermen áriptestik baılanystaryn kúsheıtý mańyzdy.
Al jergilikti mektepter zııatkerlik mektepterdiń tájirıbesin keńinen qoldanýy tıis. Ásirese, aǵylshyn tilindegi baǵdarlamalardy kóbeıtken jón. Shymkenttegi ýnıversıtetter halyqaralyq deńgeıge kóterilip, Ortalyq Azııa men Ońtústik Azııa elderiniń abıtýrıentteri kelip, osy jerde oqýǵa yntaly bolýy qajet. Sondaı-aq Elbasy Shymkent qazirgi zamanǵy ınnovasııalyq ortalyǵyn qurýǵa kirisýi qajettigin atap kórsetti.
Shymkent qalasynyń ákimi Ǵabıdolla Ábdirahymovtyń qala kúnin belgileý boıynsha bastamasyna Elbasy qarsy bolmady.
«Tarıhshylar qalanyń irgesi qalanǵanyna 2200 jyl bolǵanyn dáleldeýde. Qazir IýNESKO-ǵa da arnaıy qujattar daıyndaýdamyz. Biraq qanshama ǵasyr ótse de, qalamyzdyń resmı kúni áli belgilenbegen. Qalamyzdyń erekshe mártebesin ózińiz arnaıy Jarlyqpen 19 maýsym kúni bekittińiz. Osyǵan baılanysty, qala jurtshylyǵy qala kúnin soǵan belgileýdi usynyp otyr», - dedi Ǵ.Ábdirahymov.
Prezıdent ondaı bastamaǵa qarsy bolmady. Alaıda, qala kúnin naqty tarıhı derekterge negizdep, sodan bastaýdy usyndy. «Shymkent Uly Jibek jolynda turǵan kóne qala. Shymkent, Taraz bar. Negizi, meniń qarsylyǵym joq. Eger 2200 jyl dep aıtsaq, solaı ataıyq, sodan bastaıyq. Biraq ony dáleldeý kerek», - dep atap kórsetti N.Nazarbaev.
Jumys sapary barysynda Memleket basshysy megapolıstiń turǵyn úı qurylysy jáne áleýmettik ınfraqurylymǵa qatysty josparymen tanysty. Elbasyna qaladaǵy nysandar qurylysy men olardy rekonstrýksııalaý týraly aqparat usynyldy.
Sondaı-aq Memleket basshysy Halyqqa qyzmet kórsetý ortalyǵy, Jumyspen qamtý ortalyǵy, Kóshi-qon qyzmeti jáne Azamattardyń hal aktilerin jazý bólimi (AHAJ) ornalasqan áleýmettik qyzmet kórsetý ortalyǵymen tanysty. Áleýmettik qyzmet kórsetý ortalyǵynda «Shymkent» ÁKK tóraǵasy Rashıd Aıýpov úshinshi megapolısti sıfrlandyrý jobalary týraly baıandady.
Ortalyq qala turǵyndarymen qatar sheteldik ınvestorlar úshin de sıfrlyq formatta memlekettik qyzmet kórsetýge baǵyttalǵan. Memleket basshysyna ekonomıkanyń túrli sektorlaryn, sonyń ishinde agroónerkásip kesheni, bilim, turǵyn úı-kommýnaldyq sharýashylyǵy, densaýlyq saqtaý, kólik jáne qaýipsizdik salalaryn sıfrlandyrý jobalarynyń iske asyrylýy jóninde baıandaldy.
«Shymkent iri megapolıske aınalady. Munda jańa jobalar iske asyrylýda. Eńbekqor shymkenttikter qalany damytýdyń kepili sanalady. Jumystyń eń mańyzdy baǵyty – shaǵyn jáne orta bıznes. Ony damytý úshin tıisti qoldaý kórsetý qajet» – deı kele Elbasy halyqqa memlekettik qyzmet kórsetý isiniń sapasyn arttyrý jáne jedeldetý úshin sıfrlandyrý baǵdarlamasyn júzege asyrýdyń mańyzdy ekenin atap ótti.
Ǵalymjan ELShIBAI,
«Egemen Qazaqstan»
Shymkent