«Rýhanı jańǵyrý» baǵdarlamasy boıynsha Berlındegi «Betanııan» sýretshiler úıinde (Kunstquartier Bethanien) Qazaqstan Ulttyq mýzeıiniń «Fokýs Qazaqstan» halyqaralyq jobasy aıasynda «Astyq jáne raýshan gúlder: qazaqstandyq sýretshi áıelderdiń tórt býyny» atty kórme ashyldy. Ekspozısııaǵa tanymal qazaqstandyq sýretshilermen qatar jas óner ıeleriniń de týyndylary qoıylǵan. Uıymdastyrýshylar atalǵan kórme zamanaýı mádenıetimizdi álemge nasıhattaý baǵytyndaǵy kezekti shara ekenin aıtady.
Kórmeniń kýratory Devıd Ellıottyń aıtýynsha, kórme orys avangardynan bastalady, alaıda ekspozısııa sándik-qoldanbaly óner eksponaty – tekemetpen ashylady. «Sýretshilerdiń qazirgi býyny beıneleý ónerindegi joǵalyp bara jatqan halyq dástúrlerin qaıta jandandyrýǵa tyrysty», deıdi ol.
«Astyq jáne raýshan gúlder» ekspozısııasynyń basym bóligi 1980-1990 jyldary qalyptasyp, búgingi kúnderi de damyp kele jatqan ónerdi jan-jaqty qamtyǵan. Is-sharaǵa uıytqy bolýshylar bul baǵytta Tatıana Glebova, Vera Ermolaeva, Aısha Ǵalymbaeva jáne Gúlfaırýz Ysmaıylova sııaqty aldyńǵy býyn sýretshilerdiń úlken eńbek sińirgenin aıtady.
Ekspozısııadan oryn alǵan eńbekter qatarynda Sáýle Súleımenovanyń sellofannan jasalǵan týyndylary bar. Sonyń biri – 1930 jyldary Qazaqstandaǵy ujymdastyrý kezinde el halqynyń úshten biriniń ómirin jalmaǵan náýbetti kezeńdi beıneleıtin «Asharshylyq» atty eńbegi.
Kórmeniń teń jetekshisi Almagúl Meńlibaeva «Toqamaq» jáne «Stepnoe barokko» beıne ınstallıasııalaryn usyndy. Baqyt Búbiqanovanyń «Jańa jyl túni» týyndysynyń ózegi – áıel. Sýretshi áıeldi kompozısııanyń ortasyna ornalastyryp, onyń qoǵamdaǵy róli men orny týraly saýaldy kóldeneń tartady. Áıeldiń jalańash denesi – áleýmettik rólderdi májbúrlep tańýǵa qarsylyq ispetti.
Sonymen qatar kórmede Anar Áýbákir, Lıdııa Blınova, Ǵanııa Shaǵataeva, Zoıa Falkova, Kreol ortalyǵy (Marııa Vılkovıskaıa, Rýfııa Jenderbekova), Ǵaısha Madanova, Áıgerim Májitqan, Almagúl Meńlibaeva, Gúlnur Myrzaǵalyqova, Gúlnur Muqajanova, Katıa Nıkonorova, Sáýle Súleımenova, Gúlmaral Tátibaeva, Elena Vorobeva, Natalıa Dıý syndy sýretshilerdiń týyndylary qoıylǵan.
«Egemen-aqparat»