Zaısan aýdanynyń aýyldaryna birtindep gaz bara bastady. Keńsaı, Aınabulaq, Qarabulaq aýyldyq okrýgteriniń turǵyndary tabıǵı kógildir otyndy úılerine kirgizip, qýanyshqa kenelip jatqan jaıy bar.
Máselen, Aınabulaq aýylynda 70, Keńsaıda 79, Qarabulaqta 62 úıge gaz qosylypty. «Jýyqta aýdandaǵy toǵyz eldimekendi aralap, gazdandyrý máselesi boıynsha turǵyndarmen kezdesý ótkizdim. Gaz tartý jumystary kezeń-kezeńmen júrgiziletinin túsindirdim. Bıyl aýdandaǵy 9 eldimeken gazben tolyq qamtylady», - deıdi Zaısan aýdanynyń ákimi Temirbek Qasymjanov.
Úılerine gaz jetkizilgen aýyl turǵyndary dán rıza. «Mine, úıimizge gaz kirip, bar qıynshylyqtan arylǵaly otyrmyz. Endi ot jaǵyp, kómir tasyp áýre bolmaımyz. Qaı jaǵynan alyp qarasaq ta gazǵa qosylý tıimdi. Qazir qatty otynnyń baǵasy sharyqtap tur. Sonyń bárin eskersek, gazdyń paıdasy óte mol. Aýyl turǵyndary atynan memleketke, aýdan, oblys basshylyǵyna rızashylyǵymyzdy bildiremiz», - deıdi alǵashqylardyń biri bolyp gaz tartqan Aınabulaq aýylynyń turǵyny Baqytbek Saspaev.
Qazirgi ýaqytta Zaısanda aýyldarǵa gaz tartý jumystary eki kezeń boıynsha júrgizilýde. Birinshisi, negizgi qubyrdan aýyldarǵa jetkizý bolsa, ekinshisi, kentishilik jáne kvartalishilik gaz qubyryn tartý. Aýdan ákiminiń aıtýynsha, 2020 jylǵa deıin aýdandaǵy 37 eldi mekenniń 18-in gazben qamtý josparlanǵan. «Aýdandy gazdandyrý týraly arnaıy baǵdarlama bar. Sol baǵdarlama boıynsha Zaısan qalasyn tolyǵymen aıaqtadyq. Bıylǵy basty maqsat – 9 eldi mekendi gazǵa qosý. Bul degenińiz – 10 myń adam. Buǵan qaladaǵy 16 myń adamdy qossańyz, bıyl 26 myń adam kógildir otynǵa qol jetkizedi», - deıdi Temirbek Qasymjanov.
Zaısannyń gazyn oblystyń ózge de aýdandaryna jetkizý josparlanyp otyrǵany belgili. Irkilip turǵan bul iske «Prezıdenttiń bes áleýmettik bastamasy» serpin bergendeı. Sáýir aıynda oblysymyzda mańyzdy bes bastamany iske asyrýǵa arnalǵan «Jol kartasy» ázirlengen bolatyn. «Jol kartasy» boıynsha aımaqtyń ońtústik óńirlerin gazdandyrý máselesi jóninde arnaıy jumys toby qurylyp, iske kirisip ketti. Zaısan, Tarbaǵataı, Úrjar jáne Kúrshim aýdandarynyń aýyldyq eldi mekenderine magıstraldy jelilerdi jáne avtomattandyrylǵan gaz taratý stansııasyn (AGTS) salý jobasyn halyqaralyq qarjy ınstıtýttaryn tartý arqyly júzege asyrý josparlanyp otyr. Joba boıynsha gaz qubyrlary 4 baǵytta salynyp, uzyn sany 95, 314 myń adamdy kógildir otynmen qamtýǵa múmkindik týmaq.
Azamat QASYM,
«Egemen Qazaqstan»
Shyǵys Qazaqstan oblysy,
Zaısan aýdany