Maqtanyń otany sanalǵan Maqtaaral aýdanyna Qazaqstan Respýblıkasy Premer-Mınıstriniń orynbasary, Aýyl sharýashylyǵy mınıstri О́mirzaq Shókeev pen Túrkistan oblysynyń ákimi Janseıit Túımebaev jumys saparymen keldi. Maqtaly ólkedegi aýyl sharýashylyǵy salasynyń damý barysymen tanysqan mınıstr birneshe nysandardy aralady, dep habarlaıdy Maqtaaral aýdany ákiminiń baspasóz qyzmeti.
Eń aldymen mınıstr Dostyq aýyldyq okrýgi, Gúlistan aýylyndaǵy «Darmon» sharýa qojalyǵyna bardy. Qojalyq basshysy Davron Týımatov bıyl 46,38 gektar jerge egin ekken. Onyń 5 gektary dándik júgeri bolsa, qalǵan 41,38 gektary maqtalyq alqap. 15 adamdy jumyspen qamtyp otyrǵan «Davron» sharýa qojalyǵynyń tehnıkalyq jaǵdaıy da jaqsy. Atap aıtqanda, 2 dana Altaı (T-4), 2 dana MTZ, 1 dana maqta terý kombaıny, 3 dana tirkemesi mol ónim jınaýǵa múmkindik berip otyr.
Jalpy Maqtaaral aýdanynda 38 593 gektardan asa jerge maqta shıti sebilgen. Bıyl ortasha eseppen gektarynan 21-24 sentnerden ónim alý kózdelip otyr. Búginde aýdandaǵy maqta qabyldaý beketterine 20 myń tonnadan astam aq altyn kelip túsken bolsa, dıqandar terim bitkenshe 80 myń tonna aq ulpa jınap alýdy josparlaýda. Ol úshin 365 terimshiler brıgadasy, 100-ge jýyq kombaın maqta terý naýqanyna jumyldyrylǵan.
Maqtanyń tezirek ashylýy úshin aýdanda qazirdiń ózinde 33 myń gektardan astam maqtalyq alqapqa defolasııa sharalary jasalǵan. «Drob plıýs», «Avgýron ekstra», «Kotton», «Reglon-sýper» hımıkattarynyń maqta japyraǵyn túsirýdge tıimdi áseri baıqalýda. «Kósekterge kún jaqsy tıgen soń tezirek ashylyp jatyr. Kóptegen sharýalar defolıasııanyń paıdasyn bilmeıdi. «Maqta salmaq joǵaltady» dep ony jasaýdan qashady. Kók kósekter kúzde úsik shalǵanda bir-aq ashylady. Ondaı maqtanyń sapasy da bolmaıdy» - dedi D.Týımatov.
Munan soń mınıstr О́.Shókeev Qazaqstan-О́zbekstan Respýblıkalarynyń shekarasynda ornalasqan «Dostyq» kanalyndaǵy №73-shi sý rettegish kóldeneń tospasynyń jaǵdaıymen jáne aýdanda júzege asqaly turǵan PÝID-2 baǵdarlamasynyń barysymen tanysty.
Maqtaaral aýdanynda 40 myńǵa gektarǵa jýyq jer PÝID-2 baǵdarlamasyna engen. Jobanyń birinshi etapy boıynsha Eńbekshi jáne Jańajol aýyldyq okrýgine qarasty 8 myń gektar jerde tik drenajdy uńǵymalardy salý, kollektorlyq júıeler men kanaldardy tazalaý jumystary bastalǵaly tur. Ol úshin merdiger anyqtalyp, qurylystyń bastalýy úshin daıyndyq jumystary jasalýda. Sondaı-aq, jobanyń ekinshi kezeńi Iirjar men Jambyl aýyldyq okrýgteriniń 16 myń gektaryn qamtysa, úshinshi kezeń boıynsha Atakent kenti, Maqtaaral jáne A.Qalybekov aýyldyq okrýgteriniń 15 myń gektardan astam egistik alqaby jer asty sýlarynan arylyp, tuzdanýdan saqtalmaqshy.
Osylaısha mınıstr óńirdegi aýyl sharýashylyǵy salasyna qatysty atqarylyp jatqan jumystarǵa oń baǵa berip, keıbir máseleli jaǵdaılardan da qulaǵdar boldy. Aýdan ákimi Baqyt Asanov J.Nurlybaev aýyldyq okrýgine qarasty K-17 kanaly men Jańa jol aýyldyq okrýgine qarasty K-15 kanaldaryn jáne 57 dana tik drenajdy uńǵymalardy respýblıkalyq menshikke ótkizý jáne «Severnyı» sý qashyrtqysynyń sý ótkizý qabiletin arttyrý maqsatynda mehanıkalyq tazalaýdan ótkizý jumystaryn jasaý kerektigin aıtyp, mınıstrden máselelerdi sheshýge yqpal etýdi surady.