Densaýlyq saqtaýdy damytýdyń 2016–2019 jyldarǵa arnalǵan «Densaýlyq» baǵdarlamasyn ózektendirý aıasynda densaýlyq saqtaý mınıstri Eljan Birtanov pen oblys ákimderiniń baıandamalaryn tyńdaǵan Premer-Mınıstr Baqytjan Saǵyntaev densaýlyq saqtaýdyń ózekti máseleleri boıynsha birqatar naqty tapsyrmalar berdi, dep habarlaıdy Premer-Mınıstrdiń baspasóz qyzmeti.
Baıandalǵan aqparatqa sáıkes, kóptegen kórsetkishter boıynsha (sábıler ólim-jitiminiń, qantamyr júıeleri,obyr men týberkýlez aýrýlarynan ólim-jitimniń azaıýy) densaýlyq saqtaý sapasynyń artýy baıqalyp otyr. Degenmen, Premer-Mınıstr Baqytjan Saǵyntaev oblys ákimderiniń baǵdarlamanyń bekitilgen kórsetkishterin ýaqytyly oryndaýyna nazar aýdartty.
Osyǵan baılanysty Densaýlyq saqtaý mınıstrligine ákimderdiń usynystaryn qarastyryp, memlekettik baǵdarlama aıasyndaǵy jumystardy odan ári belsendirý úshin qosymsha tetikterdi pysyqtaý tapsyryldy.
Sonymen qatar mınıstrlikke dári-dármektermen, medısınalyq buıymdarmen, kadrlarmen qamtamasyz etý máseleleri boıynsha jumystardy júıeleý, sondaı-aq densaýlyq saqtaý nysandarynyń materıaldyq-tehnıkalyq jaı-kúıi men zamanaýı medısınalyq jabdyqtarmen jaraqtaý máselelerin sheshý tapsyryldy.
Densaýlyq saqtaý ınfraqurylymyn damytý, medısınalyq tehnıkamen jabdyqtaý boıynsha memlekettik-jekeshelik áriptestik tetigin belsene paıdalaný qajet.
Densaýlyq saqtaý, bilim jáne ǵylym mınıstrlikterine oblys ákimdikterimen birlesip emhanalar men aýrýhanalardy ásirese, shaǵyn mamandanǵan dárigerlik kadrlarmen jınaqtaý men oqytý, olardyń biliktiligin arttyrý, olardy áleýmettik qoldaýmen qamtý boıynsha is-sharalar qabyldaý tapsyryldy.