Mádenıet jáne sport mınıstrliginiń qoldaýymen, Elordamyz – Astana qalasynyń 20 jyldyǵyn merekeleý aıasynda Qazaqstan teatrlar Assosıasııasy uıymdastyrǵan Shet eldik sheberlerdiń qatysýymen teatr óneri qaıratkerleriniń Respýblıkalyq praktıkýmy óz máresine jetti.
1 qazan kúni Almaty qalasynda, M.Áýezov atyndaǵy Qazaq memlekettik akademııalyq drama teatrynda Shet eldik sheberlerdiń qatysýymen teatr óneri qaıratkerleriniń Respýblıkalyq Praktıkýmynyń resmı túrde jabylý saltanaty ótti.
Respýblıkalyq Praktıkýmnyń jabylý saltanatyna Qazaqstannyń Eńbek Eri, Keńester Odaǵynyń jáne Qazaqstannyń Halyq artısi, Memlekettik syılyqtardyń laýreaty, M.Áýezov atyndaǵy Qazaq Memlekettik akademııalyq drama teatrynyń kórkemdik jetekshisi, Qazaqstan Teatrlary Assosıasııasynyń Prezıdenti – Asanáli Áshimov, M.Áýezov atyndaǵy Qazaq Memlekettik akademııalyq drama teatrynyń dırektory, Qazaqstan Respýblıkasynyń Eńbek sińirgen qaıratkeri, PhD doktory Ashat Maksımuly Maemırov, Qazaqstan Teatrlary Assosıasııasynyń vıse-prezıdenti, Memlekettik Koreı mýzykalyq komedııa teatrynyń dırektory, Qazaqstannyń eńbek sińirgen qaıratkeri Nı Lıýbov Avgýstovna, teatr rejıssýrasy boıynsha sheberlik sabaqtaryn ótkizýge kelgen Grýzııalyq rejısser, Shota Rýstavelı atyndaǵy Tbılısı Memlekettik teatr jáne kıno ýnıversıtetiniń rektory, A.S.Grıboedov atyndaǵy Tbılısı Memlekettik akademııalyq orys drama teatrynyń bas rejısseri – Margvelashvılı Georgıı Nodarovıch, Halyqaralyq teatr festıvaliniń «Úzdik ssenografııa» nomınasııasynyń jeńimpazy, Álemdik Praga Kvadrıennale ssenografııasynyń laýreaty – Tamara Okıhıan qatysty.
Sharanyń ashylý rásiminde A.Áshimov pen A.Maemırov sóz bastap, Respýblıkalyq Praktıkým qatysýshylaryna A.P.Chehovtyń «Apaly sińilili úsheý» dramasyna taldaý jasaý jáne qoıylymynyń úzindisi boıynsha júrgizilgen sheberlik sabaqtaryna qatysqandyǵyn rastaıtyn arnaıy sertıfıkattar tabystady.
29 qyrkúıek pen 1 qazan aralyǵynda jalǵasqan shara barysynda qatysýshylar «Apaly sińilili úsheý» pesasyn negizge ala otyryp, dramalyq shyǵarmanyń qaqtyǵysy men ereksheligine, jańalyǵy men aıqyndyq dárejesine, aıtar oıynyń tereńdigine, týyndydaǵy árekettiń damýy men onyń fazasyna taldaý jasaı kele, A.P.Chehovtyń ózge de dramalaryndaǵy ssenografııalyq sheshimder týraly oı qozǵady. Sondaı-aq, jınalǵan barlyq rejısser men akterlar erekshe qıyndyqtar týyndaıtyn negizgi máseleler men kúrdeli epızodtarǵa (sahnalar men qubylystar) jáne de sahnalyq keńistiktiń plastıkasy men ssenografııalyq qaqtyǵystarǵa aıryqsha mán berdi.
Respýblıkalyq Praktıkým – Qazaqstan teatrlar praktıkasyna teatrdyń zamanaýı formalaryn tanystyrý men engizýge, elimizdegi barlyq dramalyq jáne mýzykalyq-dramalyq teatrlardyń damýy men baılanysyn nyǵaıtýǵa, talantty shyǵarmashyl jastarǵa qoldaý kórsetýge, teatr rejısserleri men óner qaıratkerleriniń kásibıligin arttyrý jáne tájirıbe almasýǵa múmkindik týdyrý úshin ǵana emes, jalpy alǵanda teatr óneriniń órkendeýi úshin jasalynyp otyrǵan shara.
Praktıkýmǵa jınalǵan elimizdiń ár oblysynan kelgen rejısser, akter, sonymen qatar T.Júrgenov atyndaǵy Qazaq Ulttyq óner akademııasy stýdentteri sheberlik saǵattarynan ótip, rýhanı sabaq alyp, dúnıetanymdarynyń ózgerip, ónerde ózgeshe jol, baǵyt baǵdar alary sózsiz.