Elimizdiń agroónerkásip keshenin (AО́K) damytýdyń 2017-2021 jyldarǵa arnalǵan memlekettik baǵdarlamasyn iske asyrý sheńberinde Aýyl sharýashylyǵy mınıstrligi memlekettik qyzmetterdi kórsetý úrdisterin avtomattandyrý, onyń ishinde sýbsıdııa berýdi avtomattandyrý boıynsha keshendi jumys júrgizýde.
Osy bir mańyzdy sharaǵa baılanysty keshe Ortalyq kommýnıkasııalar qyzmetinde Aýyl sharýashylyǵy vıse-mınıstri Arman Evnıev baspasóz máslıhatyn ótkizdi. «Sýbsıdııalaý úderisterin avtomattandyrý berilgen ótinimder merzimin 2,5 ese qysqartyp, jeń ushynan jalǵasatyn jemqorlyqty azaıtady», dep atap kórsetti ol BAQ ókilderimen kezdesýde.
Qazirgi kúnge deıin elimiz boıynsha, AО́K jumystaryn sýbsıdııalaýdyń 14 baǵytynyń ishinen tyńaıtqysh boıynsha sýbsıdııa tóleý sharalaryn tolyq avtomattandyrý júrgizildi. Atap aıtqanda, osy baǵyt boıynsha onlaın túrde 18,2 mlrd teńgege 20 myń elektrondyq ótinim tapsyrylǵan bolatyn. Qolǵa alynǵan avtomattandyrý sharalarynyń arqasynda 17,1 mlrd teńge somasyndaǵy ótinimder tólendi. Aqparattardy tekserý avtomatty túrde júzege asyrylyp, ótinimderdi qaraý merzimi bar bolǵany 1 kúndi qurady.
Jaqyn arada eginshilik mádenıetiniń basqa da sharalaryna sýbsıdııa berý máselelerin avtomattandyrý jumysy júrgiziletin bolady. Bul rette kóktemgi dala jumystaryna jáne egin oraǵyna qajetti janar-jaǵarmaı materıaldaryna jáne basqa da taýarlyq materıaldardyń baǵasyna memleket tarapynan sýbsıdııa tóleý máseleleri avtomatty túrde júzege asyrylatyn bolady. Jyldyń aıaǵyna deıin eginshilik salasyndaǵy qalǵan baǵyttar boıynsha sýbsıdııa tóleý sharalary tolyq avtomattandyrylmaq. О́z kezeginde bul berilgen ótinimderdi qaraý merzimin 2,5 ese (18 kúnnen 7 kúnge deıin) qysqartýǵa múmkindik beredi. Sonymen birge sýbsıdııalaý júıesin avtomattandyrý adam faktoryn azaıtyp, jemqorlyq sybaılastyqqa tosqaýyl qoıatyn bolady. Memlekettik qyzmetterdi kórsetý úrdisterin avtomattandyrýdyń taǵy bir mańyzdy yqpaly Sýbsıdııalaý qarajatyn bólý komıssııalarynyń jumysyn toqtatady. Bul sýbsıdııa berý kezinde laýazymdy tulǵalardyń is-sharaǵa aralasýyna tosqaýyl qoıyp, jobalardy qarjylandyrýdyń ashyqtyǵyn qamtamasyz etedi.
Sondaı-aq sýbsıdııalaý úrdisin avtomattandyrý baqylaý men monıtorıngileýdi naqty ýaqyt rejiminde júrgizýge múmkindik beredi. Iаǵnı, fermer ózi tapsyrǵan ótinimdi ótinimder tiziminen naqty ýaqyt rejiminde kóre alady. Sonymen birge derekterdi jınaý men óńdeý barysynda qaǵazbastylyq joıylady. Ortalyq jáne jergilikti basqarý organdar arasyndaǵy qujat aınalymy tómendeıdi.
Sýbsıdııalaý júıesin avtomattandyrýdyń taǵy bir tıimdi jaǵy, memlekettik qyzmetterdi alýshylar úshin ınternet jelisi arqyly barlyq sharalardy atqarýǵa múmkindik beredi. Olar Halyqqa qyzmet kórsetý ortalyqtaryna barmaı-aq memlekettik qyzmet kórsetýdiń jalpy úrdisin naqty ýaqyt rejiminde baqylaı otyryp, ýaqyttaryn únemdeıdi. Qoryta aıtqanda, sýbsıdııa berý júıesin avtomattandyrý sharalary – aýyl sharýashylyǵy salasynyń eńbekkerlerine kórsetilgen tıimdi de yqpaldy kómek.
Jylqybaı JAǴYPARULY,
«Egemen Qazaqstan»