Bir asaba toı ústinde jas balany qasyna shaqyryp, esiminiń qalaı qoıylǵanyn, qandaı maǵyna beretinin surady. Áp-ádemi esiminiń tarıhyn aıtyp bere almaǵan balaqaı esesine shetel akterleri men mýltfılmindegi basty tulǵalardy aıtýǵa kelgende qamshy saldyrmady. Qobylandy, Alpamys batyrdy estigen, anyq bilmeıdi. Al sheteldik juldyzdardy sanap berýde múdirmeıdi.
Kiná balaqaıda emes, olarǵa qyzyǵatyndaı tanymdyq dúnıe jasap bere almaı otyrǵan úlkenderdiń ózinde bolsa kerek. Jas búldirshinder úshin mundaıda mýltfılmderdiń orny bólek.
Osyndaı tanymdyq fılmdi Qyzylorda oblysynyń týmasy, aýdarmashy, psıholog Symbat Ábdirahmanova jasap júr.
Búginde elimizde sapaly anımasııalyq fılmder az. Al kıeli Syr óńiriniń tarıhynan syr shertetin mýltfılm ataýlysy joqqa tán eken.
Bal qyzyq balalyqqa óńirdiń tarıhy men kıeli jerlerin, sulý tabıǵaty men ǵajap tulǵalaryn nasıhattaý úshin tanymdyq dúnıelerdiń qajettigi aıqyn ańǵarylǵan soń Symbat táýekelge minipti.
«Qazaqstandaǵy 100 jańa esim» jobasynyń byltyrǵy jeńimpazy Symbat Ábdirahmanova «Sıqyrly kilt» anımasııalyq mýltfılmine alty aı ýaqytyn sarp etken. Mýltfılmniń jasalýyna «Bilim Foundation» qoǵamdyq qory da demeýshilik kórsetken.
– О́lkemizdiń keshegi tarıhy men búgingisin baılanystyrǵan týyndyǵa úzdik pedagogter men tarıhshylardy tarttyq. Sondaı-aq keıipkerlerdiń únine oblysqa tanymal ártisterdiń daýysy paıdalanyldy, – deıdi Symbat.
Symbat Ábdirahmanova, sonymen qatar balalarǵa arnalǵan qazaq tilindegi damytýshy mýltfılmder jasap shyqqan aıtýly maman. Árıne mundaı úlken jobalardy júzege asyrý tek iskerlikti, bilimdilikti ǵana talap etpeıdi. Qazaqstannyń «100 jańa esimi» qataryna kirgen Symbat Ábdirahmanova týraly tereńirek aıtar bolsaq, onyń ómir jolyna úńilýge týra keledi.
Qyzylorda qalasynyń týmasy Symbat Ábdirahmanova Abylaı han atyndaǵy Qazaq halyqaralyq qatynastar men álem tilder ýnıversıtetinde 2005-2009 jyly «fılologııa» mamandyǵyn támamdaǵan. 2007 jyly Iran memleketiniń «Tabotaboı» ýnıversıtetinde arnaıy biliktilik arttyrý kýrsynda bilim alǵan. 2007-2009 jyldary Iran Islam Respýblıkasynyń Qazaqstandaǵy elshiliginde aýdarmashy qyzmetin atqardy. 2009-2011 jyldary «ilespe aýdarmashy» mamandyǵy boıynsha magıstratýrada bilimin shyńdady. 2012 jyldan bastap Qyzylorda oblysynyń bilim basqarmasy janyndaǵy oblystyq oqý ortalyǵynda «Áleýmettik pedagogıkalyq qyzmet» bóliminiń meńgerýshisi qyzmetin atqaryp keledi.
Symbattyń psıhologııa salasynda da eńbegi zor. Ol – «Kompıýterlik psıhodıagnostıka» atty jasóspirimder arasyndaǵy psıhologııalyq jobanyń, «Kámeletke tolmaǵandar arasyndaǵy sýısıdter prevensııasy» BUU balalar qory jobasynyń, sondaı-aq «Logorıtmıka» ádistemelik quraldarynyń avtory. 2016 jyly Ispanııa memleketiniń Ovedo qalasynda ótkizilgen on altynshy «Sýısıd jáne sýısıdaldy áreket» taqyrybyndaǵy Eýropalyq sımpozıýmda «Qazaqstandaǵy kámeletke tolmaǵandar arasynda sýısıdterdiń aldyn alý: Qyzylorda oblysynyń tájirıbesi» dep atalatyn baıandama jasap, álem sarapshylarymen óz tájirıbesimen bólisti.
«Qazaqstannyń 100 jańa esimi» jobasynyń jeńimpazy bylaı deıdi:
– 2012 jyly oblystyq oqý ortalyǵyna jumysqa turǵan bolatynmyn. Sol kezde alǵash ret múmkindigi shekteýli balalarmen jumys jasaı bastadym. Osy balalarǵa qandaı da bir kómek, qolushyn bergim keldi. Logoped mamandarǵa kómegi tıetin, balalardy damytatyn otandyq fılmder jasap shyǵardym.
Búginde eresekterdi qoıyp jas balalardyń arasynda óz-ózine qol jumsaıtyn oqıǵalar kóbeıip ketti. Symbat Ábdirahmanova osy keleńsiz qubylystyń aldyn alý baǵytynda da jemisti jumys jasap júr.
– Biz jasaǵan baǵdarlamada bala test tapsyryp, avtomatty túrde jaýaby shyǵady. Psıholog ony kóre otyryp, qaı balamen ári qaraı jumys jasaý kerektigin ózi saraptap alady. Aldaǵy ýaqytta bul jobany respýblıka kóleminde taratý boıynsha jumys jasalyp jatyr, – deıdi ol.
Baqtııar TAIJAN,
«Egemen Qazaqstan»
Qyzylorda oblysy