Túrkistan qalasyndaǵy Q.A.Iаsaýı atyndaǵy HQTÝ-diń Mádenıet saraıynda «Ońtústik Qazaqstan» gazetiniń «Jaqsylar, dastan aıtaıyn...» atty II aımaqtyq jas jyrshylar baıqaýy ótti.
«Alpamys batyr» jyryn jatqa aıtýdan mektep oqýshylary arasynda uıymdastyrylǵan baıqaýǵa qatysqan Shymkent qalasyndaǵy №100 «Toǵjan» balabaqshasynyń tárbıelenýshileri tórt jasar Qydyráli Ábdisabyr men bes jasar Shynar Toıymbetova (tálimgeri – Joldykúl Tórebekova) «Alpamys batyr» anımasııalyq fılmine dýblıaj jasap, jyrdy jatqa oqydy. Baıqaýǵa qatysqan 33 úmitkerdiń ónerin quramynda Qazaqstannyń eńbek sińirgen qaıratkeri, zań ǵylymynyń doktory, professor Beket Turǵaraev, Halyq ártisi, ánshi Qajybek Bekbosynov, Shymkent qalasyndaǵy О́.Jánibekov atyndaǵy №19 mekteptiń qazaq tili jáne ádebıeti pániniń muǵalimi Aınash Jumataeva, A.Pýshkın atyndaǵy №1 mektep-lıseıiniń oqytýshysy Ásel Temirbaeva jáne «Ońtústik Qazaqstan» gazetiniń dırektor-bas redaktory Abaı Balajan bar qazylar alqasy saralady. Úmitkerlerdiń 20-sy ekinshi kezeńge ótip, bılet boıynsha suraqtarǵa jaýap berdi. Al jyrdaǵy kónergen sózderdiń mánin túsindiretin úshinshi aqtyq kezeńge 10 oqýshy ótti.
Sonymen bas júldeni (200 000 teńge) otyrarlyq Oljas Bakıra jeńip alsa, ustazy Aınur Álsherige avtokólik kilti tabys etildi. Shardaralyq Ásel Tólep 1-oryndy ıelense, eki birdeı 2-oryn otyrarlyq Qazyna Bakıra men arystyq Ulsana Muqanǵa buıyrdy. Úsh birdeı 3-oryndy sozaqtyq Rábııa Shaltaı men Nesibeli Saılaý jáne arystyq Áljappar Jorabekov enshiledi. Taǵy 5 oqýshy men ustazdaryna yntalandyrý syılyǵy berildi.
Ǵalymjan ELShIBAI,
«Egemen Qazaqstan»
Túrkistan oblysy