Qazaqstan Respýblıkasy ortalyq mýzeıinde «Otbasymen mýzeıge!» festıvali ótti. Dástúrli festıvaldiń negizgi maqsaty – otbasyndaǵy rýhanı, mádenı qundylyqtardy saqtaý, jas urpaq tárbıesin qalyptastyrý men otbasy ınstıtýtyn nyǵaıtý deıdi uıymdastyrýshylar.
Tálimdi otbasylardy taǵylym tórine súırep, januıa múshelerine túgel qýanysh syılaǵan merekelik shara aıasynda vıktorınalyq suraqtar, túrli baıqaýlar, sheberlik-saǵattary, mýzeı mamandarynyń el tarıhy, mádenıeti týraly taqyryptyq sabaqtary men ekskýrsııalary júrgizildi. Festıvalge balalar klýby, shyǵarmashylyq akademııalar, bilim berý ortalyqtary, beıneleý stýdııalary, sýretshiler, sándik-qoldanbaly óner sheberleri, mýzykalyq ujymdar men belsendiler atsalysyp, jas kórermenderge arnalǵan túrli oıyn-saýyqtyq baǵdarlamalar sharanyń shyraıyn ashty.
Konserttik baǵdarlamada QR Halyq ártisi Murat Serkebaevtyń basshylyǵymen «Almaty qalasy Ákiminiń konserttik orkestri» óner kórsetip kópshilikti aıryqsha áserge bóledi. Qurmanǵazy men Jaıaý Musanyń ataqty klassıkalyq týyndylary, opera jáne balet teatry áýenderiniń úzindileri oryndalyp, Dáribaevtar otbasy ansambli, «TRIBAL PRO» etnoujymy , «Aıbyn» balalar bı ujymy, Gýk otbasylyq ujymy óz ónerlerin pash etti.
Mýzeı qabyrǵasynda saltanat qurǵan «Qazaqstannyń flora jáne faýnasy», «Jandanǵan mura», «Ortalyq Azııa kelbeti» atty kórmeler kórermen nazaryna usynyldy. Onyń ishinde joba aıasynda arnaıy uıymdastyrylǵan otbasylyq jarqyn sátterden syr shertip, balalardyń shyǵarmashylyq qabiletterin arttyrý maqsatynda qoıylǵan «Meniń otbasym, meniń Almatym» kórmesin aıryqsha ataı ketken jón. Kórmege qalamyzdyń 19 balalar beıneleý stýdııalary, sheberhanalar men óner mektepteriniń jumystary qoıylǵan.
Barlyq kelýshiler arasynda el, qala tarıhy týraly vıktorınalyq oıyndar men baıqaýlar oınatyldy. «Bul ne, ol qaıda?» slaıd-vıktorınasy, «Ákem, anashym, men – eń keremet otbasy» atty jeke tapsyrmalary bar baıqaý, «Mýzeı gúli qulpyrǵanda», «Shyǵys arýy», «Biz – mýzeısúıer otbasymyz», «Bizdiń otbasymyzdyń erekshelikteri», «Meıramdar ártúrli bolady» aıdarlary boıynsha ótkizilgen baıqaýlar qonaqtarǵa jaǵymdy áser syılady. Festıvaldiń basty ereksheligi sol, kelýshilerdiń barlyǵyna ekskýrsııalar tegin. «Nege ol qyzyqty?», «E. Sıdorkın shyǵarmashylyǵynyń tarıhy men keremeti» syndy qyzyǵýshylyq tanytatyn tematıkalyq tapsyrmalardy, «Qazaqstannyń Qyzyl Kitap betterinen», «Ortaǵysyrlyq keramıkanyń beınelik dekoryna jańa kózqaras», «Búgingi kún – erteńgi tarıh» jáne taǵy basqa tyń jobalar shymyldyǵyn túrdi. Saıahatty jaqsy kóretin otbasylar pasport alyp, mýzeıdiń ekspozısııalyq zaldaryn aralaý múmkindigine ıe bolsa, arnaıy uıymdastyrylǵan «Qazaqstan tarıhy labırınti» oıynynyń jeńimpazdaryna mýzeıdiń estelik syılyqtary úlestirildi.
Arman OKTIаBR,
«Egemen Qazaqstan»
ALMATY