Oblystyq veterınarııa basqarmasynyń basshysy Altynbek Abdollaev baspasóz aqparat quraldarynda jarııalanǵan aqparattyń shyndyqqa janaspaıtynyn málimdep, joqqa shyǵardy.
Keı BAQ betterinde Qyzyljar óńirinde Nıýkassl indetiniń shyǵýyna baılanysty kórshi el tarapynan qus etteri men jumyrtqa ónimderine shekteý qoıylǵany jaıly jazylǵan bolatyn.
Eske salaı keteıik, shilde aıynda Aıyrtaý aýdany Eleskoe eldi mekeninde Nıýkassl aýrýynan birjarym myń taýyq qyrylyp qalǵan bolatyn.
«Indettiń aldyn alý sharalary júrgizilip, eki myńnan astam taýyqqa vaksına qoıyldy. Qaýipti oryndar túgel zalalsyzdandyrylyp,birneshe aýylǵa dezınfeksııa jasaldy. Aýdanda karantın shekteýi qazan aıynda alynyp tastalady. Reseı tarapynan ónimderdi shekaradan shyǵarmaý týraly eshqandaı resmı qujat túsken joq. Saýda-sattyq baılanysy qalypty júrip jatyr. Oblys Reseıge taýyq jumyrtqasyn ǵana eksporttaıtynyn aıta ketken jón», deıdi atalmysh vedomstvo jetekshisi A. Abdollaev.
О́mir ESQALI,
«Egemen Qazaqstan»
Soltústik Qazaqstan oblysy