Q.Jubanov atyndaǵy Aqtóbe óńirlik memlekettik ýnıversıtetiniń stýdentteri men professor-oqytýshylar quramy Memleket Basshysynyń tikeleı efırden joldanǵan aldaǵy 2019 jylǵa arnalǵan Qazaqstan halqyna Joldaýyna bir kisideı qulaq túrdi. Bul úshin Q.Jubanov ataýyn ıelengen konferens-zalǵa keń formatty ekran qoıyldy. Qazaqstandyq damý jolynyń barlyq qyrlary jan-jaqty qamtylǵan keń tynysty kemel oıly Elbasy Joldaýy aıaqtalǵannan keıin esimi elge tanymal ǵalym, fılosofııa ǵylymynyń doktory, professor Amangeldi Aıtalyǵa jolyǵyp, respýblıka Prezıdentiniń jańa Joldaýynan alǵan áseri jóninde aıtyp berýin ótingen edik.
- Memleket basshysynyń keshegi Qazaqstan halqyna Joldaýynyń buǵan deıingi Joldaýlarmen salystyra qaraǵandyǵy basty ózgesheligi elimizdegi saıası-ekonomıkalyq jáne áleýmettik máselelerge tereń taldaýlar jasalýynda. Neden uttyq? Neden utylys taýyp júrmiz? Osyndaı basy ashyq saýaldarǵa taıǵa tańba basqandaı naqty jaýaptar qaıtarylǵany bul Joldaýdyń taǵy bir artyqshylyǵy. Al onyń basty mazmuny qandaı degenge máselege kelsek, adamdyq damý men adamı resýrstar birinshi kezekke shyqqanyna aıqyn kóz jetkizemiz.
Ras, adamı kapıtaldyń órisin tereńdetý men keńeıtýge qatysty birqatar tujyrymdar Elbasy tarapynan buǵan deıin de aıtylǵan-dy. Al bul joly sheshimin tabýǵa tıisti máselelr túbegeıli tarqatyldy dep aıtýǵa tolyq negiz bar. Joldaýdyń basynan aıaǵyna deıingi basty ózegi men julyny qazaqstandyqtardyń ál-aýqatyn odan ári kótere túsýge baǵyttalǵan. Bul rette Elbasy mektepter men joǵary oqý oryndaryndaǵy bilim berý sapasyn odan ári kóterýdi alǵa qoıady. Deni saý ult qana irgetasy berik memleket qura alady. Osy oraıda Joldaýda barsha qazaqstandyqtardyń densaýlyǵyn saqtaý men jaqsartýǵa ári ortasha ǵumyr jasyn odan ári ósirý úshin aldaǵy jerde iske asatyn keshendi sharalar jan-jaqty qamtylǵany úlken mereı.
Buǵan deıin birqatar jaǵdaılarda tek biryńǵaı ekonomıkalyq ósim jóninde aıtylyp, adamdyq damýǵa qatysty máseleler ekinshi kezekke ysyrylyp kelgeni de jasyryn emes. Joldaýda osy ekeýiniń birligi men úılesimine basa nazar aýdarylǵan. Dál osy máselege qatysty Aqtóbe óńirinen bir mysal keltire ketkenniń artyqshylyǵy bola qoımas. Munda sońǵy ýaqytta ekonomıkalyq ósim bes paıyzdyq mólsherdi quraǵany jıi aıtylyp júr. Bolmasyn demeımiz, bolsyn árıne. О́sim de qurasyn. Sonymen bir mezgilde qarapaıym turǵyndardyń ál-aýqatynyń deńgeıi, jalaqysynyń mólsheri, tabıǵı demografııalyq ósiminiń jaı-kúıi, adamnyń ómiri tipti kerek deseńiz onyń ólimi jóninde nege aıtpasqa, nege bul máselelerge nazar aýdarmasqa? Túıtkil týǵyzǵan tustarǵa qatysty nege naqty sheshim almasqa? О́ıtkeni qaı kezde de qoǵameyń basty tiregi ári basty baılyǵy adamdar bolyp qala bermek. Osy turǵyda Elbasynyń keshegi kúni Qazaqstan halqna arnalǵan Joldaýy adamdyq damýǵa arnalǵan Joldaý dep batyl túrde aıta alamyz. Taǵy bir aıtaıyn degenim, meniń oıymsha keń aýqymdy, tereń tynysty Joldaýda Qazaq tilinde, ıaǵnı memlekettik tilde aıtylǵan sózderdiń úles salmaǵy tym az sekldi kórindi. Al, túıip aıtqanda bul Joldaýdyń orny da, máni de mazmuny da aıyryqsha dep bilemiz.
Jazyp alǵan:Temir QUSAIYN,
«Egemen Qazaqstan»
AQTО́BE